dyton mupawaenda
Kingstone Mapupu
MAPURISA eZimbabwe Republic Police (ZRP) kuMasvingo vari kutsvaga mwanasikana ane makore 14 ekuberekwa wekwaNgundu kwaChivi uyo akangoshaikwa nemusi wa6 Kurume gore rino achienda kuchikoro.
Inspector Kudakwashe Dhewa vanova mutauriri wemapurisa kudunhu reMasvingo vanoti Agnes Gwauya akashaikwa nemusi uyu nenguva dza6 mangwanani.
“Semapurisa eZRP, takabatana nemhuri neruzhinji rwekwaNgundu kuMasvingo, tiri kutsvaga mwanasikana wemakore 14 ekuberekwa anonzi Agnes Gwauya anobva mumusha waSabhuku Gwauya kwaMambo Nemauzhe kwaChivi uyo akangoshaikwa kusvika nanhasi haana kuonekwa,” vanodaro Insp Dhewa.
Vanoti mwana uyu aiva akapfeka mbatya dzechikoro dzinosanganisira navy blue skirt, blue shirt nejuzi renavy blue.
“Musikana uyu mushava paganda rake uyewo tinoti vane ruzivo nekune mwana uyu ngavazivise chero mapurisa ari padyo navo. Vanogona zvekare kuzivisa Officer In-Charge Ngundu ZRP, Inspector Etwell Ngara, panhamba dzinoti 0782 384 927 ne0312370221 kana kutaura naInvestigating Officer (IO) Constable Fortunate Choto panhamba dzinoti 0774 648 286,” vanodaro Insp Dhewa.
Vanoti vari kushushikana zvikuru nekushaikwa kuri kuita vana mudunhu reMasvingo vachizotadza kuzivikanwa kuti vakaenda kupi.
“Tine nyaya dzevana vari kushaikwa mudunhu redu reMasvingo, zvikuru vana vechikoro inova nyaya yatine kushushikana nayo. Mugore ra2023, pane mwanasikana wemakore 13 anonzi Samantha Manyevere aigara kuRunyararo West achidzidza pachikoro cheVision Academy uyo akadzorerwa kumba nemukuru wechikoro wepo nekuda kwekuti akanga asina kubhadhara mari yechikoro achibva angoshaikwa zvachose kusvika nanhasi haasati awanikwa. Tine dzimwe nyaya dzakadai dzakawanda mudunhu redu reMasvingo dzekushaikwa kwevana,” vanodaro Insp Dhewa.
Online Reporter