admin
Abel Ndooka
SHASHA yemusambo weSungura, Somandla “Mafia” Ndebele, anoti rwendo rwaafamba munyaya dzekuimba rwurefu uye rwunoda kushinga.
Ndebele – uyo anotungamira chikwata cheDenda Brothers – auya nedambarefu rake rechi23 rinonzi “Chinono Chinengwe”.
Muhurukuro neKwayedza, Ndebele anoti zvakakosha kuti vaimbi vari kusimukira vave vakarongeka kana vachida kusvika kure mune zvekuimba.
“Chokwadi mhanzi inotoda hushingi hukuru, zvinoda kuti uzvipire. Muimbi unofanirwa kurongeka uye uchiziva zvauri kuita.
“Takabva kure uye kuti tinge tiri patasvika pano inyaya yekuti taiziva zvatinoda. Ndiri kupemberera kuparura dambarefu rangu rechi23, vashoma vanokwanisa kuzviita,” anodaro Soma.
Anoti musambo weSungura wange uchisarira kumashure mumakore adarika nekuda kwekuti vamwe vari kukundikana kubika zvitsva asi kungotevedzera zvakaimbwa nevamwe kare.
“Dambudziko randaiona nderekuti vaimbi variko kuti vabike mhanzi yavo, vamwe vanoba kana kutevedzera zvakaimbwa kare izvo zvisingasimudzire musambo uyu. Pave kudiwa kuridzwa zvitsva zvinoita kuti vatsigiri vanakirwe.
“Vechidiki vari kukwenya Sungura ndiri kuvakurudzira kuti ngavabike musambo uyu vachidira tumunyu kuti zvinakidzire. Vatsigiri vaneta nekunzwa chinhu chimwe chete, pamwe unotonzwa wega kuti gitare iri rakatorwa parwiyo rwanhingi uye iri ndereparwiyo rwanhingi,” anodaro Ndebele.
Muchinda uyu akatsikisa dambarefu rake rekutanga – Chido Chemoyo – mugore ra1989 uye akambonetsa nenziyo dzinosanganisira Moyo Wekurera naZvemberi Makasa.
Online Reporter