adminSHASHA yakambonetsa mumutambo wenhabvu ichitambira zvikwata zvinoti Dynamos FC pamwe neCAPS United, Freddy Mkwesha, akabuda muchipatara umo maakagara kwemasvondo matanhatu achirwara nechirwere cheshuga.
Kwayedza svondo radarika yakashanyira Mkwesha kuHighfields muHarare uko kwaaitandara kumba kwemunin’ina wake apo paakazivisa bepanhau rino kuti akapotsa asiya nyemba nekuda kwechirwere ichi.
“Ndakanga ndafa wena. Ndakagara masvondo matanhatu muchipatara uye Mwari vachiri kundida munyika ino,” akadaro Mkwesha.
Zvakadaro, Mkwesha akatenda zvikuru nhengo dzebhodhi reDynamos FC dzakaita saKenny Mubaiwa, Benard Mariot naGeorge Shaya avo vaimutsigira panguva yaairwara iyi.
“Ndinotenda zvikuru hama dzangu dzakaita saKenny Mubaiwa, Bernard Mariot pamwe naGeorge Shaya nevamwe avo vaiuya kuzondiona muchipatara.
“Rudo rwavakandirakidza rukuru uye ndosaka ndichiri pano panyika,” akadaro Mkwesha.
Online Reporter