adminLizzy Mushoriwa
MURUME wekuSunningdale, muHarare, anoti ava kutyira upenyu hwake sezvo mukoma wake achigara achimuudza kuti achamuroya nenyaya yekuti akapinda muchimbuzi achizvibatsira anosiya tsvina yake irimo.
Kasim Kanyama akamhan’arira Mahommad Madi kuHarare Civil Court achiti ari kumushaisa rugare.
“Mambo, ndauyawo kuno nemukoma wangu uyo andishaisa rugare pamba patakasiirwa nevabereki vedu. Mukoma vanondishungurudza, ndinorohwa uye kutukwa nguva nenguva. Mudzimai wangu anova muzvere pari zvino vanongoti aite mabasa epamba asi iye asingazvikwanise,” anodaro.
Anoti zvakare ave kutyira upenyu hwake sezvo Madi achiti anoda kumuroya.
“Ndava kutyira upenyu hwangu nekuti mukoma vanozviti in’anga, vachatiroya nekuti tinosiya tsvina muchimbuzi.
“Handisirini ndinosiya tsvina iyi asi ndave kungotya kuroyiwa namukoma n’anga,” anodaro.
Madi anopikisana nechikumbiro ichi achiti haasi kushungurudza Kanyama.
“Anonyepa, handimushungurudze ini asi kuti iye ndiye asinganzwisise bedzi. Pakauya mukadzi wake akati haaite basa nekuti kumba kwavo kwaiva nemusikana webasa. Anotora maraitsi emuchimbuzi achiisa mumba make, ukamubvunza oti ndanetswa,” anodaro Madi.
Mutongi Larzin Ncube akarasa chikumbiro chaKanyama achiti hapana umboo huzere hunoratidza kuti ari kushungurudzwa naMadi.
Online Reporter