admin
Khanyile Ndebele
UMLOBI omkhulu wakoBulawayo oloba ingwalo ngolimi lwesiNdebele, uMihla Sitsha Tsheza othole isicoco kumaRoil Bulawayo Arts Awards ngempelaviki uthi ufisa ukuthi amabhuku akhe acine esesenziwa amafilimu.
UTsheza unikezwe isicoco se-Outstanding Ndebele Literary Work kukhangelwe ugwalo lwakhe olulesihloko esithi, Ngubani owabulala uDube.
UTsheza uthe ukuthola isicoco seRoil BAA kumtshengisele ukuthi abantu bayawubona njalo bayawuncoma umsebenzi wakhe.
“Isicoco lesi singijabulisile impela njalo ngaphandle kokujabula sengikhangele ukukhuphula izinga lokuloba kwami. Ukuthola lesi sicoco kungitshengisele ukuthi ngiyakhula emsebenzini wami, kwaveza lokuthi umsebenzi wami awusiwokuzilobela kuphela nje, abantu bayawubona njalo bayawuncoma,” kutsho uTsheza.
UTsheza uveze ukuthi lonyaka ubekhethwe ukuthi avotelwe ukuthi athole izicoco ezintathu. Esakuqala ngesaMaqhawanentaba eSouth Africa okukhangelelwe ukuthi impumela yawo iphume ekuqaleni kukaMapalakazi, esesibili, ngeseCameroon okuthiwa yiPan African Cultural Festival eCameroon (PANAFES) lapho athola isicoco se Youth Pan Africanist Award, esokucina yilesi asithole ngempelaviki koBulawayo kumaRoil BAA Arts Awards lapha athole khona isicoco njalo.
UTsheza uveze ukuba ukungena kumncintiswano wezicoco kumphathise ngoba kwenze wananzelela ukuthi usemncintiswaneni kwamenza wakhuthala lezinga abekulo lakhuphuka.
Utshilo njalo ukuthi ingwalo zakhe ulesifiso sokuthi zingapheleli ekufundeni kumbe ekubaleni kodwa zidlulele kumabonakude, abantu bazibukele sezingamafilimu.
“Ngikhangelele ukuthi ngidlule ngiye phambili ngingene ku-film industry. Ingwalo esengazilobayo ngifisa zibengamafilimu zibonwe kumabonakude, sengikhangelele ukuthi ngikhuphuke ngingami ndawonye” kutsho uTsheza.
Ingwalo zikaTshezi ezimbalwa zisetshenziswa ezikolo kuzifundo zesiNdebele.
Umlobi uthi wagqugquzelwa ukuthi aqale ukuloba ngumlobi omkhulu uNdabezinhle Sigogo.
Online Reporter