Online Reporter
KUVIKI ephelileyo kulogogo ophume kumisakazo wagcwala lakunkundla zokuxhumana kuthiwa uwile endiza labangane bakhe bamtshiya.
Kulolodaba kusolwa ukuba laba bebevela loya, yebo bakhona abakwenzayo lokhu kodwa kubalulekile ukuthi siqaphele ukuba kulomkhuhlane ohlasela abantu asebebadala obizwa ngokuthi yi-dementia ngolimi lwaboNdlebe Zikhanyilanga.
Umkhuhlane lo wenza umuntu omdala alibale ngitsho lezihlobo zakhe. Lokukhuluma uyabe esewumana akhulume ingqe yini engagqize qhakala, kwesinye isikhathi angaphuma esiyachitha amanzi uyaphuma esambuzini enqunu.
Lalapho abelele khona uyakukhohlwa angene kwenye indlu kumbe ahlanhlathe ngeganga kuze kuse lapho ahlangana khona labantu bakhuze umhlola bahle bathi ngumthakathi oselweyo kanti ngitsho.
Ngikhumbula kuleyinye imuli abangakhulumisaniyo lomalukazana kasalugxobi ekhaya labazukulu ethi wesaba ukuloywa ngugogo.
Kwathi ngelinye ilanga evakatshile ekhaya evela edolobheni kumkakhe, kwakutshisa walala evule umnyango ukuthi kutshaye umoya, ugogo ngenxa yalumkhuhlane waphuma ekamelweni lakhe esiyachitha amanzi wafika wangena ekamelweni likamalukazana walala.
Umalukazana kazange amuzwe engena ngenxa yokuthi wayephuzile ukujumeka ngenxa yokutshisa, kuthe sekusemadabukakusa sekuqandelela walala obukaBhuka, uthe ephaphama sekusile ethi mehlo suka wathola ugogo utshaye amanqetshane efile nya yibuthongo.
Waphuma engumtshoko eklabalala okosane elitshiswe lilambazi elimini, ngesikhatshana kwagcwala abantu befuna ukuzobona ukuthi kanti umalukazana wakhala kanje ngabe kwenzenjani kwahle kwathiwa ugogo ubeloya umalukazana nanko phela wayenqunu endlini engasiyo yakhe.
Umdeni wahlala phansi sekuthiwa isalukazi seNkosi sihlawuliswe, omunye wakunanzelela ukuthi izinto ezikhulunywa ngugogo ziyaphambana kodwa abanye bemba phansi bethi uyaloya, ubefuna ukugangela umalukazana.
Ngicela bantu singanindi ogogo labokhulu ngodaka lobuthakathi siqale sihluzisise ukuthi okwenza benze njalo asikugula yini kumbe ngokunye.
Phela umuntu nxa esegulile uyatshwabhana khona nxa isalukazi sithe sakhupha iqhiye okungamaqwayibana kwenwele kumenza umuntu abemubi lalapho kuthiwa ngumthakathi uvele ukholwe.
Ayixabene.
