‘Ngwarirai maporofita’

Munyori weKwayedza —
SADUNHU Murombedzi, VaMark Murombedzi, vanoti nyaya yemitumbi miviri yakaworera mumba ichinzi ichamuka yakavakahadzisa zvikuru.

Vanoti zvakakosha kuti veruzhinji vasangogashire mashoko ose-ose kubva kune vamwe vanhu vanozviti maporofita.

“Muporofita uyu akavhundutsira hama dzake achiti iye akafa aizomuka nekuzomutsawo baba vake avo aiti vachazofa uye vakabvawo vazoshaika,” vanodaro.

Sadunhu Murombedzi vanoti zvisinei nezvakaitika izvi, vanokumbira vanhu vemudunhu ravo kuti vatambire vemhuri iyi vogara navo zvakanaka.

“Zvakadai hazvina kumbobvira zvakaitika muno. Pane chivanhu chinonzi chinoda kuitwa icho hama dzevafi ava dzakati dzakazvipira kuita zvose zvinodiwa.

“Tichapira nyaya iyi kuvakuru vari muno votibatira basa racho rekuchenura nzvimbo. Mhuri iyi inoti ichaita nyaradzo yavanoti yakasiyana nezvatinoita kuno asi havarambidzwe, vanoita,” vanodaro.