admin
Nyasha Mutena
MUKOMANA wekuChitungwiza wekubuda mubepanhau rino achinzi akatsatika kun’anga uko ainge aendeswa kunorapwa chirwere chepfungwa akawanikwa svondo rino ari pane rimwe sowe riri kuKuwadzana 7, muHarare. Mitchell Zhanje (20), uyo anogara kuMayambara, kwaSeke, akashaikwa nguva pfupi yadarika apo anonzi ainge aendeswa kune imwe n’anga iri kumasango ekuZengeza 5 inongonzi Sekuru Mhofu kunorapwa.
Kubva panguva iyi, Mitchell ainge asingazivikanwe kwaari uye anonzi musi wa5 Chikunguru akasvika pasowe raMadzibaba Lotebele Simon (34) vanotungamirira chechi yeJohanne Masowe yeNyenyedzi Nomwe kuKuwadzana 7 apo ange akachengetwa kusvikira neChipiri svondo rino.
Madzibaba Lotebele vanoti Mitchell akasvika pasowe ravo achiti ane nzara uye aida kunamatirwa. Vanoti vakabva vamubatsira sezvaaida mushure mekunge vaona kuti anorwara nepfungwa.
Vanoti mumwe mwana wemutendi wechechi yavo, Catherine Guni, ndiye akazotaura kuti ainge averenga nyaya yaMitchell mubepanhau reKwayedza.
“Mwana uyu akasvika tiri pamasowe tichiita mabiko ndokukumbira kunamatirwa uye aiti aida svutugadzike sezvo aiva nenzara. Takamupa akadya asi takazoona kuti ndiye ane nyaya yakabuda muKwayedza achinzi ari kutsvagwa,” vakadaro Madzibaba Lotebele.
Vanoti Mitchell akamboita dambudziko rekuzvimba nhengo yake yesikarudzi apo vakazomuendesa kuchipatara cheHarare Central Hospital, uko akarapwa ndokupora. Amai vaMitchel, Mai Constance Chinakira, vakazara nemufaro nekusanganiswa kwavakaitwa nemwana wavo ndokuti havaigona kutenda veKwayedza zvakakwana nebasa rayakavaitira.
“Chokwadi Mwari akuitirei zvakanaka veKwayedza, handigone kukutendai zvakakwana. Maita henyu mandisanganisa nemwana wangu,” vakadaro Mai Chanakira apo vakaona mwana wavo pamasowe apa.
Mudzimai uyu akashanyira mahofisi eKwayedza nguva pfupi yadarika achida kuti nyaya yekushaikwa kwemwana wake iburitswe munhau.
Online Reporter