adminMunyaradzi Gunduza
MUSEVE USINGAPOTSE
Matambudziko anowira vatambi: (tinoenderera mberi)
Dambudziko rekurohwa rinobuda Pondai paanenge akabata ndarira dzaive muhuro maKaringe achimubvunza kwaive nemwanakomana wake, Tafirenyika. Apa anenge achimukwatura mambama. Chikwaikwai paanoda kuedza kupindura Pondai, anobva atsokerwa mudzonga wenyama mukanwa ndokurohwazve mbama.
Mubhuku iri vatambi vanosangana nedambudziko rekutapirwa hama dzavo. Izvi zvinoonekwa kuna Karinge anotapirwa hanzvadzi dzake naMambo Mupambi mushure mekunge vakunda kubatsira Pondai kupamba umambo hwaMambo Chakaingesu. Pondai anopa Nyamaropa akanga akamirira Mambo Mupambi mhandara gumi dzaisanganisa hanzvadzi dzaKaringe.
Vatambi vanowanikwa mubhuku iri vanowirwa nedambudziko rekuparadzirwa musha. Izvi zvinoitika kuna Mambo Mushoshoma panguva yavanenge vachirwara vari kudzimbahwe ravo kwavairapirwa. Mauto aMambo Mupambi anopamba musha wavo ndokusiya vauparadza, izvo zvitunha zvangoti kata kata nemusha wese.
Vatambi vari murungano urwu vanosangana nedambudziko reurwere. Dambudziko iri rinowira Mambo Mushoshoma.
Tinoenderera mberi svondo rinouya.
Zvinyorwa izvi zviri mubhuku rakanzi, Ongororo yeNhetembo neMabhuku Shona O-Level.
SHOKO HARIVHIKWI
Mubvunzo nemhinduro yesvondo rakapfuura:
7. Nhetembo dziri munaShoko Harivhikwi dzinoti yaSolomon H. Munorevesa inonzi Vazukuru neyaBlessing Magodo; Rega ndikubaire zanhi ndedzerayiro. Zvino chiburitsa fanano nesiyano yadzo wakanangana nezvadzinoreva uye mashandisirwo ezvidavado. [25]
Mubvunzo watokupa nhetembo navananyanduri vadzo, chasara kuti uratidze panobuda fanano nesiyano yadzo wakatarisana nezvadzinotaura nezvidavado zvakashandiswa. Fanano nesiyano inofanira kuenzanisa nhetembo dzese dziri mbiri.
Nhetembo idzi dzakafanana pakuti dzese dzine dingindira rekurayira vazukuru. Muna Vazukuru nyanduri anoti, “Mazano marayanwa vazukuru.” Muna Rega ndikubaire zanhi munonzi, “Vhura nzeve, ndikubaire zanhi muzukuru.”
Fanano ndeyekuti vananyanduri vanorayira vazukuru vavo vaine chishuwo chekuti vaite zvakanaka muupenyu sepanonzi munaVazukuru, “Kurai zvakanaka vazukuru.” MunaRega ndikubaire zanhi nyanduri anoti, “Nhaka youpenyu ndakupakurira.”
Imwe fanano ndeyekushandiswa kwechidavado chetsumo kuratidza kuti muupenyu ruzivo runogovanwa. MunaVazukuru nyanduri anoti, “Mazano marayanwa vazukuru.” MunaRega ndikubaire zanhi munonzi, “. . . mazano marairanwa.”
Fanano inobuda pakuti vananyanduri vari kurayira vazukuru vavo kuti upenyu hunoda kushinga sepanonzi munaVazukuru, “Urwu rwendo rurefu runotoda manyatera.” MunaRega ndikubaire zanhi nyanduri anoti, “Vimba necheziya rako muzukuru.”
Munhetembo mbiri idzi munorayirwa vazukuru kuti vasararame nenzira dzisina kururama nekuti dzinovapinza mumatambudziko anogona kuvatorera upenyu sepanonzi munaVazukuru, “Nzira dzokugurisira dzine mabhinya.” MunaRega ndikubaire zanhi munonzi, “Ukaita hwemombe yamashanga unofa.”
Nhetembo idzi dzine siyano pakuti munaVazukuru, nyanduri anorayira ‘vazukuru’ asi munaRega ndikubaire zanhi nyanduri ari kurayira ‘muzukuru.’ Imwe siyano iri kubuda pakuti munaRega ndikubaire zanhi nyanduri ari kurayira muzukuru wake kuti asatarisire zvinhu zvenhaka sepaanoti, “Ukaita tembanhaka wairasa.” MunaVazukuru hamuna pfungwa yakadai.
Nhetembo idzi dzine siyano pakuti munaRega ndikubaire zanhi, nyanduri anoshandisa chidavado chedimikira sepaanoti, “. . . ndakuruma nzeve, . . . uchidya nhoko dzezvironda.” MunaVazukuru hamuna chidavado chedimikira.
Musiyano ndewekuti munaRega ndikubaire zanhi hamuna chidavado chefananidzo asi munaVazukuru chinobuda panonzi, “Zvimerwa zvamunoona izvi, inenge pfumvudza.”
Ndinokusiirai mubvunzo unotevera wekuti musare muchizviitira moga:
8. Blessing Magodo anofarira dingindira rezvematongerwo enyika mukudetemba kwake. Tsigira pfungwa iyi nenhetembo dzake nhatu dziri munaShoko Harivhikwi. [25]
Ndinokupai mhinduro yacho svondo rinouya.
- Zvinyorwa izvi zvinowanikwa mubhuku rinonzi Mhinduro Yeuvaranomwe Mabhuku neNhetembo: Shona O-Level (Revised Edition).
Online Reporter