admin
Johas Moyo
BAKHALELWE ngamasongo ejele omahotsha abathathu beGokwe kulandela ukugwaza babulale indoda le eZhombe eyehluleke ukubhadala imali akade beyivumelene yokuthengisa umzimba, uMthunywa uyakuveza ngokugcweleyo lokho lamhlanje.
Isiga lesi senzakale ngoLwesithathu ngeviki ephelileyo emavinkilini aziwa ngokuthi kukoJoel khonale eZhombe.
Kubikwa abetheswacala abathathu laba bahlanganela indoda engaziwayo ibizo layo okucatshangelwa ukuthi ilikorokoza bayiquma ugqogqogqo ngamabhodlela okubangele ukuthi ifele khonapho.
UMthunywa ulandiselwe ngabafakazi abaqotho ukuba indoda le elikorokoza kucatshangelwa ukuthi yafela ukwehluleka ukubhadala imali ababeyivumelene ye-short time.
UNkosazana Silibaziso Ndlela othengisa kwesinye isitolo kule indawo ubike ukuthi abetheswacala ngabantu abaziwayo kule indawo lanxa amabizo ababiza ngawo engawokusoma agoqela uDollar, uMaChance kanye loNyembezi.
“Ngezwa sekungumsindo ebhawa lapho engabona khona indoda engaziwayo isilele phansi phakathi kwechibi legazi abetheswacala bephethe amabhodlela afileyo okuyiwo abamgwaza ngawo, lawo ayesegcwele igazi.
“Indlamanzi ezazilapho zibona lokhu zahle zachitheka kwasekubizwa amapholisa afika athatha izitatimende asethwala isidumbu, abopha labetheswacala,” kutsho uNkszn Ndlela.
Esinye njalo isakhamuzi uMnumzana Mthulisi Mahlangu ubike ukuthi yena wayekhona kusenzakala linkemenkeme njalo kazake abone abantu besifazana abalolunya njengalabaya.
“Kangila nkani ngalokhu engakubonayo. Ngilokhu ngilala ngisethuka lakhathesi. Kambe abantu besifazana abalezibindi zokugwaza indoda ife kabuhlungu kangaka.
“Akusigazi lokudlala elalimpompoza empinjeni wendoda leya. Kodwa angiboni ukuthi babebodwa amantombazana lawa ngabona babesenziwa butshwala ngoba lokhu abakwenzayo yibugebengu xathu,” kutsho uMnu Mahlangu.
UMnumzana Baleck Mabaleka laye oyisakhamuzi kule indawo uveze ukuthi omahotsha laba babebanga imali londoda lo abambulalayo.
“Ngesikhathi abane laba bephikisana kwakukhulunywa ngemali engicabangela ukuthi ingabe yayingeyocansi umufi ayala ukuyibhadala.
“Esegwaziwe futhi umufi wasola omunye wamantombazana la ukuthi kungani amajazi omkhwenyana ayemgqokise wona amabili adabuka.
“Kubikwa indoda le yala ukubhadala imali ngoba isithi ithelelwe umkhuhlane wemacansini njengoba ijazi ladabuka,” kulandisa uMnu Mabaleka.
UMthunywa uxhumane njalo loThabani Dzenga oveze ukuthi ngokwazi kwakhe lakuzwayo ngokwenzakalayo ulesiqiniseko sokuthi indaba yemali yiyo eyabaxabanisayo.
“Ngezwa kuthiwa umufi wabaleka endlini esebona amajazi edabukile ngoba ethi sebembulele okuyikho okwenza umahotsha ayevumelene laye wabiza abangane bakhe bamthelela,” kutsho uMnu Dzenga.
Omele isikhulumi samapholisa eNkabazwe uAssistant Inspector Ethel Mukwende uveze ukuthi udaba lolu kalukafiki kibo kodwa uzaludingisisa.
Online Reporter