admin
NgoMvulo ngeviki yonale ezayo izizalwane zonke ezelizweni leZimbabwe bezinanza ilanga lamaqhawe, ayiwo alwela inkululeko yonaleyo esesilayo lamuhla egoqela ukunikeza abantu abansundu umhlabathi kanye lokutholiswa amandla enotho kubo bonke abantu.
Kuyinto enhle kakhulu ukuthi sikhumbule amaqhawe, ngoba kungayisiwo amaqhawe ngabe ilizwe lilokhu lisezandleni zabelungu bona ababelihluthunele okhokho bethu besebenzisa inkafulakufa okhokho ababengakayizwisisi ukuthi kanti isebenza njani.
Emva kwalokhu abelungu adlisa abeNsundu imbuya ngoluthi kwabancane indawo abeNsundu behaladwa baze bangena iganga labo bayaphenduka bethwele inkafulakufa kwabancane indawo kumntanomlungu waze wathi mayuyu akukhulunywe.
Akulamuntu ongakwaziyo ukuthi abelungu babehlupha, babephethe abantu abaNsudu luklubhu, bebahlalisa endaweni ezingafanelanga zihlale abantu, bebaholisa imali encane kakhulu besenzela ukuthi oNsundu athi mhla ehola angene esitolo salo ikhiwa imali yonke ibuyele kilo. Phezu kwalokhu abelungu babelezibhedlela zabo lapho abaNsundu ababengavunyelwa ukuthi belatshwe khona. Kwaphela lokhu abantu abamnyama labo bezwa ubunandi bukazibuse yikho nje bekholisa ikhefu lamaqhawe.
Umbuzo esizibuza wona yikuthi kanti amaqhawe ngobani? Ukuze kuthiwe umuntu liqhawe uyabe eyenzeni ngaphi, nini njalo njani?
Amaqhawe afana laboJoshua Nkomo, Simon Muzenda, Joseph Msika, Jason Ziyaphapha Moyo, Josiah Tongogara lamanye. Laba badela impilo zabo, bafulathela izimuli zabo badobha amaAK 47 balubhekisa endle bejonge ukuyangqikilana lesitha esasisidla ubhedu ngoba singafuni lenkululeko yabantu abansundu.
Ngokuzimisela kwabo babuya beyiphethe ngezandla zombili iZimbabwe yethu, iloba nje inengi labo lafela khona egangeni ngoba lifuna ukuthi izizukulwane ezizayo zihlale kuhle elizweni kungalakuhlukunyezwa.
Akhona njalo amaqhawe angazange angene iganga kodwa lawo alwa impi ngeyawo indlela njalo kumele ananzwe ngekhefu lamaqhawe. Yiwo phela ayedidizela ephekela abantwana benhlabathi ukuze badle balwe lesitha besuthi.
Yikho Mthwakazi kuhle ukuthi sikubambeni ngezandla zombili lokhu esakutshiyelwa ngamaqhawe kanye lamaqhawekazi ethu. Phela nxa singasayenzanga njalo, izitha zizabuya njalo zizembese ngesikhumba semvu zijonge ukuzasithathela inotho yethu, yona eyabuya ngokuchitheka kwegazi.
Yikho lamuhla sesawuthola umhlabathi wethu ngoba yiwo oligugu eliqukethe inotho yelizwe. Yikho futhi lapho uMvelingqangi ayithukuza khona, eyinye yakhona useqalile ukusitshengisa lapho yena ayifihlela khona abahuquluzi bomnotho.
Asimelaneni labo bonke abantu abahlanyelwe yisitha phakathi kwethu. Lababantu bafana xathu loJudasi waseBhayibhelini, ngoba bengabathengisi abafuna ukuthengisa ilizwe lethu ngemali abayigqitshwa ngamazwe asentshonalanga. Bayakhohlwa ukuthi lelilizwe labuya ngegazi lamaqhawe alele eHeroes Acre.
Lamuhla laba abahuquluzi benotho bahlanyela imbewu embi phakathi kwethu, yiyo limbewu eyasilethela ama-sanctions. Yiyo limbewu esifuna ukusilethela ububi obungahloniphi ubuntu kanye lamasiko esiqu sikaMthwakazi. Yiyo limbewu lamuhla ekhala ngokuthi abakhokheli bethu abahloniphi amalungelo abantu.
Ngubani mahlabezulu umkhokheli ongahlonipha omahotsha ngokubanikeza amalungelo abo awokuthi bathengise imizimba yabo? Ngubani onganikeza okungabafana kunye lokungamantombazana lokhu okungazaziyo lokuthi kuyini okuthiwa yizitabane amalungelo akho? Ilizwe leli amaqhawe ethu kawalilwelanga ukuthi kubelengcekeza enjalo emphakathini.
Nxa lingcekeza ingabakhona esizweni sikaMthwakazi kungumbono kaMthunywa ukuthi ubuntu bethu buyabe sebutshabalele.
Online Reporter