Online Reporter
Ethel Ncube
KUDABA oludanisayo kulendoda yesigabeni sakoNkani ngaphansi kwenduna uBunina ebulele umkayo qede yatshiya ikhiyele isidumbu endlini satholakala sesonakele.
Indaba le yenzakale ngeviki ephelileyo ngemva kokutholakala kuka-Abigail Khumalo efile njalo umzimba usuwonakele.
UMthunywa uxhumane lesinye isakhamuzi sakule indawo uNkosazana Nomusa Dube esibike ukuba babuhlungu ngesehlakalo lesi.
“URangarirai onguye obethethe umuyi ubehlala emtshaya ethi uyajola. Izikhathi ezinengi ubehlala etshaywa simxwayisa ukuthi abikele amapholisa esala. Ababili laba sacina ukubabona mhlaka 10 Mbimbitho kuwonalo umnyaka.
“Umfana wenkomo ababehlala laye wayehambe ukuyaphumula ngakibo waze waphenduka mhlaka 21, yikho lapho abiza omakhelwane ethi kulento enukayo engajwayelekanga njalo abantu ahlala labo kababoni.
“Omakhelwane babuya bafika baqoqoda babona lempukane zibhuza bavula ngamandla umnyango bathola uAbigail kudala wadlula emhlabeni esonakele indoda ingekho. Ezinye izakhamizi zahle zadinga amapholisa ayiwo abuya athwala umuyi. Okwenza sisolele umkakhe yikuthi ubehlala emtshaya njalo khathesi kabonakali, kazakali ukuthi wayangaphi,” kubika uNkszn Dube.
Esinye isakhamuzi esikhulume lephephandaba likazulu sibike ukuba lindaba iyabadanisa.
“Nxa kade engasamfuni umkakhe kungani engamxotshanga kumbe amtshiye kulokumbulala. Kambe umuntu atholakale esefile esonakele aphinde atshiye emkhiyele.
“Sifisa umkakhe abanjwe abuye azophendula imibuzo esilayo, nxa ebemsulwa ubengeke abaleke ehambe umkakhe efile. Sifisa abambonayo bathinte amapholisa abanjwe,” kubika isakhamuzi lesi.
Intatheli ixhumane lesikhulumi samapholisa eMidlands uInspector Emmanuel Mahoko obike ukuba indaba enjalo isezandleni zabo.
“U-Abigail Khumalo watholakala efile njalo esonakele ngumfana wenkomo ababehlala laye. Amapholisa adinga umka-Abigail Khumalo, uRangarirai Mutengwa onguye osolelwa icala lokubulala umkakhe.
“Sicela ongabe elolwazi ngometheswacala athinte amapholisa aseduzane laye kumbe abhale incwadi afake ku-suggestion box yamapholisa,” kuphetha uInsp Mahoko.
