adminMuchaneta Chimuka
ZVIZVARWA zveZimbabwe zvakarumbidza kusarudzwa kwakaitwa mutungamiriri wenyika neHurumende, President Robert Mugabe, kuve sachigaro wesangano reAfrican Union (AU).
President Mugabe svondo rapera vakasarudzwa, pasina kupokana, kuAddis Ababa, kuEthipoia, kuti vave sachigaro weAU.
Kutora kwavo chigaro ichi kwakaona dzimwe nyika dzekumadokero dzichibvisa zvirango zvekufamba izvo zvadzakange dzakavatemera. Vaverengi vakagashira kusarudzwa kwaPresident Mugabe, avo vanovazve mukuru-mukuru weuto reZimbabwe Defence Forces, nemawoko maviri.
VaGivemore Matanhire (45) vekuChitungwiza vanoti vanofara zvikuru nekusarudzwa kwakaitwa President Mugabe kuti vatore chigaro ichi.
“Izvi zvinoratidza kuti Africa ine chivimbo nemutungamiriri wedu uye zvinoratidza zvakare kukunda kweZimbabwe zvichitevera kubviswa kwakaitwa zvirango zvekufamba zvavakange vakatemerwa,” vakadaro VaMatanhire.
VaJonga Chikukwa (68) vekwaMutoko vanoti President Mugabe munhu ane ruzivo rwakanyanya.
“Cde Mugabe vakasarudzwa mushure mekuonekwa kuti vane ruzivo nezvirongwa maringe nezvinhu zvemuAfrica uye havana hudyire. Kusarudzwa kwavo kuchaona Africa ichibudirira zvikuru,” vakadaro.
Cde Silvia Tinoza (31) vemuHarare vanotiwo danho iri richaona vechidiki vemuAfrica vachisimudzirwa munyaya dzemabasa uye zviwanikwa.
VaKevin Ngasvi (31) vekuBudiriro, muHarare vanoti vari kutarisira shanduko huru munyaya dzekusimudzirwa kweAfrica zvichitevera kusarudzwa kwaPresident Mugabe kuve sachigaro weAU.
President Mugabe vakatsiva mutungamiriri wenyika yeMauritania, VaMohamed Ould Abdel Aziz, uye vachange vari sachigaro weAU kusvika gore rinouya.
Online Reporter