admin
Ngiphekeni bo! Ngidleni na?
Angazi ukuthi kuzadliwani lamuhla lapha ekhaya? Ngizaphekani bantu? Kuzatshetshwa ngani lapha lamuhla?
Impuphu ayikho, isitshebo asikho? Amafutha awakho? Maye babo! Ngizathathani ngibekeni lamuhla, kutsho umama womuzi enqinekela abantwabakhe ngokuzadliwa layo yonke imuli engaphansi kwakhe njengoba siphakathi kwayo nje inyanga kaZibandlela eyaziwa kakhulu ngokuthi ngu-January disease.
Phela zihlobo zami akulula ukuzuza okuzadliwa kulanga ngelanga. Nanku phela umama walapha ekhaya kaziphekeli uphekela bonke abomuzi wakhe kanye lowangakwakhe.
Ha bantu! Obaba yibo abafanele ukubona lokudinga okuzadliwa, bakulethe kumama onguyena umpheki. Bathini obaba bemizi ngensuku zalamuhla “Kudliwani lapha ekhaya lamuhla MaMoyo? Kutshetshwa ngani? Mina lingangiphi imibhida sengidiniwe yiyo bantu.” Utsho njalo nje kalethanga sitshebo. Bakwethu yikho-nje omama belemilandu mayelana lokudla kwalapha ekhaya. Ngivumelani ngibuyele emzini ngisithi, “Ngiphekeni na?”
Pheka ukudla kwesintu, kwemvelo okwakudliwa ngokhokho bethu. Kudla bani na? Labokhokho sebatshona. Ngithi pheka loMaMoyo uzakwazi lokhu kudla.
Nanku lapha
Isitshwala sempuphu yomgayiwa yamabele, yophoko, yomumbu leyengqoloyi
Imibhida: Ulude, imibhida yendumba, uhlabangubo, ibhobola, itsunga, idelele
Imifushwa: Yonke imibhida elapha ungayenza imifushwa ngokuyichaya yomile kumbe iphekiwe.
Idobi: Khanzinga amazambane acacadiweyo uwachole wenze idobi.
Inkobe: Nansi imikhakha yenkobe: amazambane, indumba, indlubu, igwadla, amatshakada, uhayezi olwenziwa ngamabele
Amajodo: Ezincezu, amakhomane, amathanga adliwa ezincezu, umxhanxa, inhopi.
Amaqebelengwana enziwa ngempuphu yomumbu yamabele kumbe ingqoloyi
Okunathwayo: Inkovu yamajodo, amahewu, umhiqo, inkovu yamaganu, lomhluzi wenyama
Izitshebo zezibungwana
Amacimbi, amahlabuse, izinhla, inswabanda, intethe
Izitshebo zochago: Ihiqa, amasi, zona izankefu, ulaza
Izitshebo zenyama: Imbuzi, imvu, inkomo, inkukhu, ingulube, lenyamazana zeganga
Ezangaphakathi: Ulusu, itwane, isadijane, inhloko, amathumbu, umbendeni, izinso, amaphaphu, amangqina, isibindi
Izithelo zeganga: Lezi-ke zihamba zitshiyana ngezindawo. Lapha ohlala khona zikhona zidinge.
Pheka udle ukholise okwakudliwa ngokhokho uphile impilo ende engelamikhuhlane.
Online Reporter