Online Reporter
Kulinyanga kaMpalakazi izisebenzi zikaHulumende ziwelwe liyezi lemvimbi zihlala zikhala ngokuthi izinto azihlangani. Kodwa kulinyanga loba zingasoze zihlangane izinto kuzakuba lobubelo nanko phela bathola le ebizwa ngolimi lwabondlebe zikhanyilanga kuthiwe yi-13th cheque (ibhonasi) bazayithola kabili.
Ibhonasi lezi zimbili; enye evela kuMongameli welizwe abone kufanele ukuthi abonge izisebenzi zakhe eseziqede iminyaka eminengi zikhala ngokoma kwezinto.
Ngihle ngezwa ngomunye umngane wami ongumbalisi esithi ngoMpalakazi uyabe elikhiwa ngoba uyabe ethwele amadola eMelika. Uthe lonyaka ngeke ambuluzelwa zinjiva njengeminyakeni.
Kuhle sibili ukuthi izisebenzi zihole ibhonasi, kodwa umuntu kumele acabangisise ngendlela efaneleyo yokuyisebenzisa ngoba abanengi bacina beyitshaphazile bathenge izinto ezingelancedo kuthi kufika uZibandlela sebebovula okwensengwakazi elele ingamunyisanga, umangoye eselala eziko.
Abanye ngiyazi bazafihlela omkabo ukuthi bahole amabhonasi amabili, beze bezwe ngabanye.
Omakhwapheni labo bayabe beyivulele ilihlo elibomvu okobubende bentondolo ehlatshelwe umkhwenyana.
Abanye bazakuthi ukuwahola lawo mabhonasi bazaphaphatheka okwamaphuphu ejuba ethuswe luhelwane ezehlukane bayovumbuluka sebengasela loba yona elesikhala.
Ngikhumbula omunye umngane wami engake ngasebenza laye wathi esebona ukuthi usetshaphaze ibhonasi yakhe lamadlecatsha wazenza umuntu owayesephambane ingqondo edinga ukuthi uzafika njani ngekhaya ngoba ikhosikazi lakhe laliluhlaza njalo wayejika isibhakela okomuntu owelusayo.
Sacina simhambisa kubosiyazi isimanga yikuthi kazange abone ukuthi umngane wami wayelahlekelwe zingqondo, wavele wathi akulalutho olubi ngaye.
Wayesenzenje ngoba inhloni zimbulele.
Kuyabe kufuna ukuthi umuntu ahlale phansi lonkosikazi wakhe babhale phansi izinswelo zabo anduba kuyiwe ebhanga, lingabonisana loba nje imali ingenelisi inhliziyo yomuntu kodwa kuba lobubelo.
Phela abadala bathi imali ngumuntu wemzini, uphanga ahambe lina lisafuna ukuba laye.
Ngithemba abazayihola bazayisebenzisa ngendlela eqondileyo labanatha uMagwebu labo bakhumbule ukunatha bangaze badlulisa amalawulo.
Ayixabene.
