adminMunyaradzi Gunduza
Mubvunzo nemhinduro yesvondo rakapera
MUSEVE USINGAPOTSE
Honzeri yematambudziko
3. Pondai ndiye honzeri yematambudziko anowira vatambi vari muna Museve Usingapotse. Tsigira pfungwa iyi nezvinhu zvishanu zvaanoita. [25]
Pondai anonokoka hondo yaMambo Mupambi kuti izorwisa Mambo Chakaingesu. Izvi zvinobuda patinomuona akarara pakati pesango arumwa nechinyavada achienda kwaMambo Mupambi kunotsvaga rubatsiro rwemauto ekuti arwise Mambo Chakaingesu kuti agovatorera umambo nechisimba. Izvi zvakazoguma zvapambisa vanasikana vaMambo Chakaingesu nemombe dzavo zana naMambo Mupambi.
Pondai anouraya Mambo Chakaingesu. Tinozviona paanokoka hondo yaMambo Mupambi kuti imubatsire kurwisa Mambo Chakaingesu. Anovabaya nemiseve gumi neumwe pavanobva kuninga vachimhanyira kunorwisa mamwe mauto aMambo Mupambi aive pedyo nemuzinda vachibva vafa ndokusara achibvuta umambo hwavo. Izvi zvinokonzera kuti Karinge apotere kwaMambo Tineshungu kwaakazokandwa muchidziva chegarwe.
Pondai anofurira Tafirenyika mwanakomana wake, kuti azouraya Karinge vaenda kunovhima. Zvinoonekwa Tafirenyika paanenge ari musango achivhima nevamwe vake. Anombozvikakavadza kuti aite zvaakaudzwa nababa vake ndokuzotanga kunyahwaira shure kwaKaringe achivavarira kumuuraya nemuseve kuti agosara ave mwanakomana wamambo.
Tinoenderera mberi svondo rinouya.
l (Zvinyorwa izvi zviri mubhuku rakanzi Ongororo yeNhetembo neMabhuku Shona O-Level)
SHOKO HARIVHIKWI
3. Sarudza nhetembo mbiri kubva muna Shoko Harivhikwi dzine dingindira rimwe chete asi dzakanyorwa navananyanduri vakasiyana. Zvino chiratidza fanano nesiyano yadzo wakanangana nezvinotevera: (i) zvadzinoreva (ii) mashandisirwo ezvidavado.
Mubvunzo uri kuda nhetembo mbiri (2) dzinotaura zvinhu zvakafanana asi dzakanyorwa navananyanduri vakasiyana. Fanano nesiyano yadzo inogona kubuda pane zvadzinotaura, zvidavado nemaumbirwo adzo. Fanano inofanira kuenzanisa nhetembo dzese dziri mbiri.
Nhetembo inonzi Wedenga yaSolomon H. Munorevesa naNyadenga yaMedia Mugandani dzine fanano inobuda padingindira rekurumbidza. Dzese dziri kuyemura rudo rwaMwari rwekuregerera vatadzi kubva kuzvivi. Sepanonzi muna Wedenga, “Imi munonaisa mvura yenyu, chero kune vakakutosvorai.” Muna Nyadenga nyanduri anoti, “Munoramba muchitidzikinura isu vatadzi.”
Fanano ndeyekuti Mwari ndivo munyaradzi wevanochema. Muna Wedenga nyanduri anoti, “Tikatsikitsira nemisodzi pamatama munoichingidzira nengoni dzenyu.” Muna Nyadenga munonzi, “Takatarira kwamuri nemisodzi pamatama, panguva yekugomera makanzwa kuchema kwedu.”
Dzese dzine fanano yezitadunhurirwa rekuti Musikavanhu, rinoratidza kuti akaumba munhu nemufananidzo wake sepanonzi muna Wedenga, “Hezvoi! Imi Musikavanhu.” Muna Nyadenga zvinonzi, “Ngaavongwe iye Musikavanhu.”
Munhetembo idzi munorumbidzwa Mwari nekuti ndivo vakatanga kuvepo sepanonzi muna Wedenga, “. . . imi Chidzachepo.” Muna Nyadenga nyanduri anoti, “. . . iyemi makasika denga nenyika.”
Nhetembo idzi dzine fanano yechidavado chechikuwo. Muna Wedenga nyanduri anoti, “Hezvo! Wedenga.” Muna Nyadenga nyanduri anoti, “Ameni!”
Imwe fanano ndeyechidavado chefananidzo. Muna Nyadenga nyanduri anoti, “Mambo wedu makatendeka makanzwa kuchema kwedu sezvamakaita nevana veIsirairi.” Muna Wedenga nyanduri anoti, “Tiripo pasi penyu, senhiyo mubapiro remhambo.”
Siyano inobuda pakuti muna Wedenga hamuna chidavado chehwevazwi asi muna Nyadenga nyanduri anochishandisa paanoti, “Tinotenda Mwari wee.”
Muna Wedenga nyanduri anoshandisa chidavado chezitaumbiridzwa kushevedza Mwari sepaanoti, “Inzwai Madzimure, Madzivabope, tiri venyu Maunganidze,” asi muna Nyadenga hamuna chidavado chakadai.
Tangai kuita tsvakurudzo yemubvunzo unotevera:
4. Tsigira zvizere dingindira rerufu rinoburitswa naAlex Chirumbwana munhetembo dzake dziri muna Shoko Harivhikwi dzinotevera: (i) Mamutora (ii) Rufu rwemhandara (iii) Manditema midzi yangu (iv) Taparadzwa
Ndinokupai mhinduro yacho svondo rinouya.
l (Zvinyorwa izvi zvinowanikwa mubhuku rinonzi Mhinduro Yeuvaranomwe Mabhuku neNhetembo: Shona O-Level Revised Edition).
Online Reporter