Online Reporter
Ethel Ncube
INHLANGANISO yeVeterinary Services ikhuthaza abalimi ukuba bananzelele umkhuhlane we-ascites ohlasela inkukhu njalo olakho ukuzibulala.
UDokotela Thomas Shumba weVeterinary Services ubike ukuba inani lenkukhu ezibulawa ngumkhuhlane we-ascites liyakhwela maviki onke.
Ekhuluma lentatheli uDkt Shumba ubike ukuba umkhuhlane lo unzima ukwelapha.
“Ngithanda ukukhuthaza abalimi ukuthi baqaphele umkhuhlane we-ascites ohlasela inkukhu ikakhulu ezenyama. Inkukhu ziyathi sezilamaviki amahlanu ziqale ukuvuka kufe ezingu-10 kanyekanye umangale ukuthi yini eziqedayo kanti sezihlaselwe yi-ascites.
Inkukhu ehlaselwe ngumkhuhlane lo iyabe igcwele amanzi esiswini. Ingagcwala amanzi esiswini kudala ukuba iphefumule nzima isisu sivuvuke icine ifile kungakho-ke umlimi wonke kumele akuqaphele lokhu,” kubika uDkt Shumba.
Uqhubekele phambili egcizelela ukuba umkhuhlane lo welapheka nzima.
“Imbangela yomkhuhlane we-ascites yisilugu esiyabe singangeni moya ngendlela efaneleyo, ukuncindizeleka ngomqando (cold stress), konke lokhu kudala ukuba zihlaselwe ngumkhuhlane lo.
Okunye okungabangela umkhuhlane lo yikuthi umlimi anikeze inkukhu zakhe ukudla okungaqondanga (Imbalanced diets). Ungabona umkhuhlane lo usuhlasela inkukhu zakho thinta abe-Veterinary Services masinyane bakucebise.
Umkhuhlane lo awelapheki kungakho umlimi akwenzayo yikuhlala ekhangela inkukhu zakhe njalo aziphe ukudla okwaneleyo abone lokuba isilugu sakhe singena umoya lokudla inkukhu ziphiwe okufaneleyo,” kuphetha uDkt Shumba.
