Online Reporter
Lovemore Dube
BATHI kwakusiba nzima ngeviki okwakudibana iHighlanders leMashonaland, eyatshintsha igama ngo1975 yaba yi-Zimbabwe Saints.
Ubudlwangudlwangu lobo baqedwa nguJoshua Nkomo owayengumsekeli kaMongameli welizwe uRobert Mugabe, lezinye inkokheli.
UNkomo owayekhokhela ibandla elalilwela inkululeko eleZapu elalilebutho leZipra, wabona isitha sisinye elizweni leli kungumbuso wochuku oka-Ian Smith leRhodesia Front.
Wasukuma uNkomo wathi kumele kube lenjongonye eyokubambana kwabaNsundu, kwesulwe amabizo amaqembu ayesehlukanisa abantu.
IHighlanders yalamhlanje yayiyiMatabeleland Highlanders okwakusenza kungani ngeyamaNdebele kukanti le esesiyazi iyiZimbabwe Saints yayiMashonaland United layo ihuga abesiShoneni koBulawayo.
Lokhu kwakusenza abaNsundu labo bakhethane njalo balwisane okwemihlobo okwakusenza impi kazibuse kungani iyaxega.
Inkokheli zalesosikhathi zathatha isixwayiso leso zaguqula amabizo amaqembu.
UDouglas Mutema owadlalela iZimbabwe Saints uthe uNkomo wenza kuhle lobanje ibizo leqembu lakhe lafaka abanye ejele.
AbeLungu baba lombuzo wokuthi kungani kukhethwe uZimbabwe olwelwayo ukuba libizo leqembu kulokuthi kuthiwe Rhodesia Saints.
UMutema waba ngabanye abambalwa abakubotshelwayo ukuba lilunga leZimbabwe Saints.
“UHulumende wayefuna ukwazi ukuthi kungani ibizwa ngokuthi yiZimbabwe Saints. Babefuna ukuthi kuthiwe Rhodesia Saints,” kutsho uMutema kungxoxo abalayo leZimpapers Sports Hub.
Wadlala labadlali abafana labo Gibson Homela, Philemon Dangarembwa, Douglas Maneto, Emmanuel Sibanda, Isaac Banda, Itai Chieza loWilliam Sibanda besesiswini senkundla.
