admin
SANGANO rakazvimirira iro rinosimudzira nyaya dzekurima kunyika dziri kuchamhembe kweAfrica rokurudzira kurimwa kwembesa diki dzinoshingirira muzuva senzira yekupedza nzara kudunhu iri.
Sangano iri reCommunity Technology Development Trust (C.T.D.T.) rine muzinda waro muguta reHarare uye riri kushanda nevarimi vemuno nevedzimwe nyika nedonzvo rekupedza nzara kuburikidza nekurimwa kwezvirimwa zvidiki zvisingade mvura yakawanda uyewo zvisinganetse kurima.
Executive director weC.T.D.T, VaAndrew Tonderai Mushita, vanoti varimi vanofanira kurima mbesa diki dzakaita semhunga nemapfunde nezvimwewo.
“Tiri kushanda nevarimi vematunhu akasiyana tichivadzidzisa kurima zvirimwa zvidiki izvi uyewo nekuvabatsira nezvinodiwa. Izvozvi muno muZimbabwe tine varimi vanodarika 50 000, takananga pakuti vanhu vagute uyewo vachiwana mari zhinji kubva muzvirimwa zvidiki izvi,” vakadaro.
Vanoti nekusanduka kwemamiriro ekunze, varimi vanofanirwa kurima zvirimwa zvinoshingirira muzuva.
“Tinoshanda zvakasimba nemakambani anouchika mbeu uyewo nemapazi ose eHurumende, zvikuru bazi rezvekurima, varimi vose kubva vadiki nevakuru tiri kushanda navo muchirongwa ichi. Tinoda kuti mbeu diki dzirambe dzichirimwa, mukatarisa kuMexico vane mbiri yekurima mupunga, kuEthiopia mbiri yavo ndeye kurima gorosi, izvi zvinosimbisa hwaro hwekudya munyika,” vakadaro.
Mamwe matunhu ane varimi vavari kushanda navo vanoti anosanganisira Goromonzi, Mudzi, Mutoko, Uzumba-Marambe-Pfungwe, Chiredzi, Tsholotsho, Chegutu neRushinga.
Vanoti vanobatsira varimi kuwana mbeu pamwe nezvimwe zvinodiwa zvekurimisa.
Online Reporter