adminEmmanuel Ndlovu
ABAHLALI besiqintini seMatobo esabelweni seMatabeleland South bathabe bamanzi te kulandela isinqumo sikaHulumende sokuthi ipulazi leMaleme lingathathwa njalo sebeveze ukuthi sebezenelisa ukulima lokufuya izibindi zithe gidi.
Kunyanga edluleyo kuqhamuke impi phakathi kwezakhamizi zeMatobo kanye lesinye isiphathamandla sikaHulumende esivezwe ngokuthi nguRodney Mashingaidze kubangwa ipulazi leMaleme.
Lelipulazi belingelikaMnumzana Peter Cunningham njalo imuli ezifika phose i-800 kubikwa beziphephela khona ngokwenza imisebenzi yezandla egoqela ukulima kanye lokufuya.
Lesi ngesinye sezizatho esenza ukuthi izakhamizi zakulindawo zisole isinqumo sokuthathwa kwalo nguMnu Mashingaidze.
NgeSonto kuyonale iviki amakhulu ezakhamizi zakulindawo abethe gwaqa esikolo se-Induna Primary elindele ukuzwa isinqumo sikaHulumende kulandela udaba lolu. Izakhamizi zithabe zaqolotsha njengamathole ephuma esibayeni ngemva kokuba induna uVuyelwa Ndiweni Nyangazonke ongumsekeli kamongameli wedale lezinduna zomdabu ezethulele umbiko wokuthi ipulazi leli alisoke lithathwe.
Esinye isakhamuzi esiziveze ngokuthi nguShadreck Moyo sithe: Siyathaba ngalesi isinqumo sikaHulumende ngoba besesingasahlalisekanga. Yikho phela lapho ebesiphila khona kuleli ipulazi njalo ukuthathwa kwalo ngomunye umuntu bekusikhathaza emoyeni.
Elinye inina eliziveze ngokuthi nguNkosikazi Benitta Tshuma elilima kwesinye isivande esikuleli ipulazi lithe selizalima inhliziyo idlala lephaphu ngenxa yesinqumo sikaHulumende.
“Besesihlalele evalweni kulandela udaba lokuthathwa kwepulazi leli. Mina ngiselela imuli yami ngokulima njalo bengikhathazekile ngesenzo sokuthathwa kwepulazi. UHulumende uyilwile mpela wasimela,” kutsho uNkkz Tshuma.
Unobhala wogatsha lweVillage Development Committee, uMnumzana Patson Ncube ugcizelele wathi nxa lelipulazi lisezandleni zabantu, isiphala senkosi sizahlala siphuphuma amabele.
Online Reporter