admin
NguMsilisi Dube
UGATSHA lukaHulumende olukhangele ngezezifuyo olweLivestock Production solukhuthaze abalimi ukuba balandele iLivestock Policy Calendar ukuze bafuye ngendlela eqondileyo ukwenzela ukuba kuthuthukiswe inani lezifuyo kuleli.
ILivestock Policy calender lugwalo oluqukethe indlela umlimi angazisebenzisa kusiya ngesigaba ahlala kuso phakathi kwesikhathi somnyaka.
Ekhuluma lentatheli, uMnumzana Cosmas Muzunde ubike ukuba ugatsha lwabo lwasungula lolugwalo ngenhloso yokuphathisa abalimi abafuyayo.
“Sananzelela ukuba abanye abalimi abakwazi ukuba izifuyo zithenwa nini, ziqunywa nini impondo lokuthi zihlatshwa nini amajekiseni. Kungakho sasesisungula iLivestock Calender ngenjongo yokufundisa abalimi,” kuchaza uMnu Muzunde.
Uqhubekele phambili ebika ukuba iLivestock Calender ichaza njalo ukuba izifuyo kumele ziphiwe kuphi ukudla kusiya ngesikhathi esiyabe sikuso umnyaka uze uyephela.
“I-calender le ichaza ukudla okumele kuphiwe izifuyo kusiya ngesikhathi esiyabe sikuso,” kuveza uMnu Muzunde.
UMnu Muzunde wengezelele ngokuthi izifuyo zilokudla okumele zikuthole kusiya ngesikhathi somnyaka kanye langomumo womkhathi.
“Inkomo zokulima ngesikhathi sokulima kumele ziphiwe ukudla okuzinika amandla ngoba kuyisikhathi somsebenzi njalo ugwalo lolu nxa umlimi elalo luyamchazela ukuba yikuphi ukudla amele aziphe khona.
Uthe abalimi abangalulandeliyo lolugwalo olwalotshwa zingcitshi zokufuya yibo abatholakala behlangana lenhlupho ezithile ekufuyeni,” kutsho uMnu Muzunde.
Abalimi abafuna ukwazi kumbe ukuthola lolugwalo kumele babonane labalimisi ukuze bancediswe kumbe bavakatshele amahofisi eLPD.
Online Reporter