admin
YiNtatheli kaMthunywa
UNATION Dube umqeqetshi wezimbamgodi iHwange FC useveze ukuthi ngobungcitshi alabo kunguqu lakumncintiswano yenkezo, ithimu yakhe ingatshiya amathimu amanengi egoqe umsila isihluthune inkezo yeChibuku.
IHwange ivakatshela koBulawayo ngoMgqibelo enkundleni yeLuveve lapho eyamukelwa khona zinkunzi zePSL iChicken Inn.
Inkezo le ibiza umvuzo wakuqala owe$75,000.
IHwange ikusimo esibi ngoba kulogu ihleli phansi. Ukutshintsha umdlalo kumncintiswano yenkezo enjengeChibuku kungayinceda ukuthi ithambise uvalo oluhlasele abasekeli bayo.
Ithimu le eyaziwa ngokuthi yiChipangano yacina ukwethusela ngesizini ka2011 lo2012.
Ngaleso sikhathi yayibalelwa kumaqembu amane aphezulu adlala okumangalisayo.
Akwaziwa ukuthi abadlali sebengenwe yini kodwa umqeqetshi uthi uzakulungisisa ngokuthaphuza kunkezo yeChibuku.
UDube uthe ngokunikezwa ithuba lokuthi aqhubeke ekhuza iqembu uzazama ukuletha icebo lokuthi iChipangano inqobe kuyo yonke imidlalo eseleyo.
“Ithimu kumele inqobe, kusesekubi kulogu kodwa kulimpelaviki siyakukhohlwa lokhu. Injongo yikutshova size sifike ku-final. Ngiyayifuna inkezo le. Ngilamacebo okuthi sinqobe.
“Ithimu le iyaziwa ukuthi ilenguqu emnandi ngakho ngeke kwethuse nxa sifinyelela umvuzo we-final yeChibuku,” kutsho uDube ophinda abengumqeqetshi weqembu lesizwe amaYoung Warriors.
Loba zimi manzonzo eHwange kumidlalo yeligi, abasekeli bayo bathi balethemba lokuthi uDube uzaletha injabulo.
UAlick Nyoni owayengukaputeni weHwange okwamasizini edlula amahlanu, laye uthe uyakholwa ukuthi lo kungaba ngumnyaka wokuhluthuna imidlalo yenkezo.
“Thina njengabadlali abake balikhaba kuHwange Football Club sithanda ukutshela ithimu yethu ukuthi silokhe siyisekela. Sifuna inkezo yeChibuku le.”
Online Reporter