Online Reporter
Kingstone Mapupu
MURUME ane makore 31 okuberekwa wepapurazi repaNumber 144 kuChenjiri kuSanyati, kudunhu reMashonaland West anonzi akaponda muzukuru wake nekuda kwechikonzero chisina kuzivikanwa.
Tinei Chipadza (31), uyo aigara papurazi rimwechete iri, anonzi akapondwa nekubaiwa nebanga nasekuru vake, Adonia Chipadza (31).
Mutauriri wemapurisa kudunhu reMashonaland West, Inspector Ian Kohwera, vanoti nyaya iyi yakaitika nemusi wa26 Kubvumbi nenguva dza9 manheru apo vaviri ava vakaenda kunzvimbo yemabhizimisi yeChindanya kuSanyati kunonwa doro.
“Vaviri ava vakaswera zuva rose vachinwa doro nevamwe vachifara ndokuzobva panzvimbo yemabhizimisi iyi nenguva dza2100 hours vava kuenda kumba ndokuzodarika nekuchechi yeJuranifiri Johane Masowe eChishanu uko vakasvikooneka sekuru vavo, VaTears Chipadza (44), avo vaiva pagungano pasangano iri,” vanodaro Insp Kohwera.
Vanoti nemusi mumwechete uyu nenguva dza11 manheru, Adonia akasvika kumba woga ndokusvikomutsa baba vake, VaVhuramayi Chipadza (54), achivataurira kuti aiva arwa naTinei achibva amubaya nebanga kamwechete pachipfuva ndokubva afa ipapo.
“Akaenderera mberi nekutaurira baba vake kuti aizozvipira kumapurisa asi pakarepo achibva anyangarika nemukati merima. Vhuramayi Chipadza, baba vacho, vakazozivisa vamwe vemumusha ndokutanga kumutsvaga vachibva vamushaya. Nemusi wa27 Kubvumbi nenguva dza0400 hours, vanhu vakazowana mutumbi waTinei Chipadza wakarara mukati medivi reropa padyo nenzira mupurazi reNumber 144 kuChenjiri kuSanyati,” vanodaro Insp Kohwera.
Vanoti nyaya iyi yakazomhan’arwa kumapurisa eZRP Sanyati avo vakaona kuti mutumbi uyu waiva neronda rekubaiwa pazasi pezamu rekuruboshwe pachipfuva.
“Mutumbi uyu wakabva watakurwa kuendeswa kumochari yechipatara cheSanyati Baptist Hospital uko waiva wakamirira kuongororwa nanachiremba. Adonia Chipadza akazosungwa nemusi wa28 Kubvumbi apo aiva akahwanda musango padyo nepamusha pavo mushure mekunyeverwa neveruzhinji,” vanodaro Insp Kohwera.
Vanoti mapurisa ekudunhu reMashonaland West ari kushushikana zvikuru nekupondana kwevanhu nekuda kwekunetsana nenyaya diki-diki.
” Semapurisa, tinokurudzira veruzhinji kuti vatsvage nzira dzekuyanana kugadzirisa gakava ravo pane kurwisana nekupondana uyewo vanhu ngavasiyane nekuda kutaura nyaya dzemumhuri vakadhakwa,” vanodaro Insp Kohwera.
Online Reporter