adminNkosilathi Sibanda
IQEMBU lesizwe kunguqu yamantombazana elamaMighty Warriors lilungiselela umdlalo wehlandla lesibili lokungena kumidlalo yama-Olympics lelizwe le-Cameroon kulimpelaviki.
AmaOlympics la ngawomnyaka ka2016 azaqhutshelwa edolobheni leRio de Janeiro eBrazil.
Ama-Mighty Warriors aphakathi kwenkinga loba enelise ukulolonga kuseselesikhathi. Udubo olwaziwayo lubangelwa yikugxanguza kweZimbabwe Football Association. Inhlanganiso yeZifa kuyaziwa ukuthi ayenelisi ukuba ikhuphe imali yokuncedisa ukuthi amathimu esizwe angene enkambeni.
Kumdlalo wakuqala kulumkhankaso, iZimbabwe yadibaniswa le-Ivory Coast, lapho isizwe esathathelwa umdlalo lo ngoba amaMighty Warriors ehluleka ukudlala kuhlandla lakuqala okwenza i-Ivory Coast ithole imiklomelo ngo-3-0.
Abafakazi abaqotho abasebenzelana leZifa, beseduzane leqembu lamantombazana leli, babikele iphephendaba likazulu ukuba ithimu isiqeqetsha eZifa Village.
Kubikwa umqeqetshi uShadreck Mlauzi ubize abadlali abangamatshumi amathathu lambili kodwa ngokutshona kwelanga langoLwesibili bekugijima abalitshumi lasitshiyagalo lunye.
Ekhuluma loMthunywa kuliviki umqeqetshi uMlauzi uthe akula okungabuyisela muva amalungiselelo akhe.
Uthe ulethemba lokuthi nguye umqeqetshi ozahambisa amaMighty Warriors ku-final yawo yokuqala kumdlalo wama-Olympics.
“Kuyathabisa ukuthi sesiqalile ukulolongela umdlalo wethu leCameroon. Ngikhuluma nje sisenkundleni yeZifa Village sizama ukudingisisa lokhu esithi ngama-combination okudlala.Silungisisa indlela esikhaba ngayo imvema ngoba sifuna ukutshengisa iCameroon ukuthi siyalazi ibhola loba sehluleka ukuzodlali kulelo.
“Abadlali bami ngibatshela ukuthi bananzelele ukuthi ukuyadlala kuma-Olympics lithuba abangasoke balithola empilweni zabo ngakho kumele badlale ngokuzimisela.”
Abadlali abathenjiweyo asebegijinyiswa nguMlauzi enkundleni yokulolonga babalisa u-Marjory Nyaumwe, uFelistus Muzongondi, uEmmaculate Msipa, uErina Jeke, uChipo Dzingirai loNobuhle Majika.
UMlauzi utshele uMthunywa ukuthi kusiyaphela iviki, ithimu yakhe izabe isijulile, ikakhulu kungabuya uTafadzwa Tsunguro, uKudzayi Chiparaushe, uDeliwe Makaha, uMoleen Murandu loMelody Musasa.
Umncintiswano wamaOlympics lo uzaqhutshwa ezweni leBrazil, edolobheni leRio de Janeiro ngomnyaka ka-2016.
Online Reporter