adminUKUPHUMULA kuqakathekile empilweni yomuntu ngakho kubalulekile ukuthi abantwana bezikolo baphumule kodwa hatshi ukuthi bavale amabhuku. Njengoba sesiphakathi kwekhefu lokuvalwa kwezikolo kubalulekile ukuba abazali bancedise abantwana emisebenzini yabo yesikolo ukuze babe lekusasa enhle.
Esikhathini esinengi izikolo zingavalwa abantwana bahle bakholwe lokubala amabhuku. Lokhu kubangela ukuba nxa sezivulwa izikolo umntwana lowo abesekhohlwe konke akufundayo.
Lokhu akuqondanga ikakhulu kubafundi asebezaloba imihloliso yabo ye O-level kanye le A-level. Lesi yiso isikhathi lapho abafundi laba okumele basebenze gadalala ngoba sekuseduze ukuthi babhale imihloliso yabo yokuphela komnyaka.
Impilo yalamuhla yeyame emfundweni ngakho ukuze umuntu athole umsebenzi omuhle kumele abe wawadla amabala.
Kwesinye isikhathi abazali bayekela abantwababo bengabali batshone bezibhodela nje lezitalada kuthi abanye betshonela iWhatsApp. Nxa lowomntwana esehlulekile ezifundweni ezwe sekuthiwa uloyiwe. Umzali nguye okumele aqonqosele umntanakhe ngokubala izingwalo ngoba kuyiyo indlela yokuthi abe lekusasa enhle.
Umzali ohlakaniphileyo kumele ahlole ingwalo zomntanakhe nsukuzonke abone lapho ehluleka khona amncedise kulokuthi azithulele amsole nxa esefeyilile. Nxa engasaphumelelanga kuyabe kungasancedi ukumsola ngoba imali iyabe isidlalisekile.
Njengoba izikolo zivaliwe abafundi labo kumele batshone ema-library kunye lebulenjini bebala kuthi labo abalezifundo ezibaphicayo labo badingelwe abangabancedisa emsebenzini wabo.
Kwesinye isikhathi abazali yibo ababangela ukuthi abantwana behluleke ngoba besehluleka ukubathengela impahla yonke efunekayo ukuze ingqondo yomntwana ihlaliseke. Nxa umntwana angaswela wandise ukubalisa okwenza lanxa efundiswa engezwa lutho.
Abanye abazali ngabahlukuluza abantwababo emacansini. Kambe engapasa njani umntwana ehlukuluzekile emoyeni? Ukuze izifundo zingene kuhle engqondweni umntwana kumele abe ekhululekile ngitsho lasemoyeni.
Abanye abafundi bafeyila nje kubangelwa yikuthi mhlawumbe useyendisiwe yena esemncinyane ngoba abazali kukhona abakufunayo kulowomuntu.
Kungumbono woMthunywa ukuthi abazali bekele ukuhlukuluza abantwana ngoba bacina sebetshiya isikolo kuthi abanye bengenzi kuhle emisebenzini yabo ngenxa yalokhu.
Online Reporter