admin
Cornelius Luphahla
Izakhamizi zesigabeni seMindora eNyamayendlovu ziphicekile ngokucatsha kwenkomo zazo ngendlela engacaciyo osokudala ukuthi ziphelelwe ngamasu okuzivikela.
Kubikwa sokulesikhathi eside izifuyo lezi zaqala ukucatsha noma nje izakhamizi lezi zazingakutshayi indiva lokhu.
UMthunywa uzwe ukuthi kulabantu asebegangile abathiya izifuyo egangeni okuyikho okwenza zinyamalale kukanti ezinye zifa ngendlela engazwisisekiyo.
UMthunywa ukhulumisane lesinye isakhamuzi esacatshelwa yinkomo kule indawo uMnumzana Felix Sibanda wachaza ukuthi kalankani ngokucatsha kwenkomo yakhe.
“Ngilokudana okukhulu ukuthi ngabe inkomo yami yayangaphi ngoba sengadinga ngaze ngadinwa. Inkomo le yacatsha ngoNhlangula ngathi mhlawumbe ingene kweminye imihlambi kodwa sokuze kulamuhla ngingayiboni.
“Isimanga yikuthi ngithe ngiyidinga kuviki ephelileyo ngathola ubabhemi ebanjwe yiwayila egangeni. Ngamkhulula ngathi ngiqeda lapho ngabona amanye amawayila angu-12 ethiyiwe ngasengiwathatha.
“Ngihle ngabona ukuthi kutsho ukuthi labobantu abathiya egangeni yibo ababamba izifuyo zethu bazibulale,” kulandisa uMnu Sibanda.
Ekhuluma lentatheli uNkosazana Sipho Ngwenya uveze ukuthi uzwa ubuhlungu kakhulu ngokufa lokunyamalala kwenkomo.
“Ngizwa ubuhlungu kakhulu ngokunyamalala kwenkomo kanye lokufa kwazo. Ngikhuluma nje eyami ithe iqeda ukunatha emfuleni yahle yafela khonapho. Kusenjalo nje akusiyo yami yodwa efileyo kodwa sezizinengi ezifa ziqeda ukunatha amanzi la,” kutsho uNkszn Ngwenya.
UMthunywa ubuye njalo waxhumana losobhuku wakule indawo uMnumzana Rodger Ndlovu wachaza ukuthi phezulu kokucatsha kwalezinkomo ezinye ziyafa.
“Noma nje inkomo zethu zicatsha kodwa ezinye ziyafa ngezizatho ezingacaciyo. Asazi kumbe zibulawa ngamanzi eziwanathayo emfuleni uMguza ngoba abantu bathiya inhlanzi ngama-mosquito net ebusuku.
“Amambule la ayabe efafazwe umuthi ngakho ucina usala emanzini okucina kubangela ukuthi inkomo zethu zife. Ngikhuluma nje sezizinengi inkomo ezafayo ngenxa yala amanzi,” kutsho uMnu Ndlovu.
Uqhubeke njalo wachaza ukuthi bazakuba lomhlangano lapho okuzakhulunywa ngale indaba ukuze bavikele izifuyo zabo.
“Sikhangelele ukwenza umhlangano mayelana lale indaba ukuze sifake umthetho wokugweba abathiya inhlanzi kanye labathiya izinyamazana ngoba bengasiqedela izifuyo zethu,” kuphetha uMnu Ndlovu.
Online Reporter