adminSHANJE dzakaparira mudzimai wemubhuku raKuora, kwaSeke, uyo akatemerwa chirango chekunofondoka zvisina mubhadharo nedare mushure mekubatwa nemhosva yekurikita muvakidzani wake achimupomera kudanana nemurume wake.Mutongi wedare reChitungwiza Magistrates’ Courts, Blessing Murwisi, akatemera Manana Matsikure (22) chirango chekugara mujeri kwemwedzi mitanhatu nemhosva yekurova Stella Katsange (18) achimuti ari kudanana nemurume wake.
Zvisinei, mutongi Murwisi akazobvisira Matsikure mwedzi mitatu pachirango ichi paine chitsidzo chekuti haafanire kupara imwe mhosva yerudzi urwu mumakore mashanu anotevera.
Mimwe mwedzi mitatu yainge yasara yakabviswa zvakare achinzi anofanira kufondoka zvakasimba kwemaawa105 paJonasi Primary School, kwekare kwaSeke.
Muchuchisi Edmond Ndambakuwa akaudza dare kuti nomusi wa3 Chikunguru munguva dzeusiku, Katsange akaita mahwekwe naMatsikure apo aienda kwaMakoni Shopping Centre.
Vari kufambidzana kudaro, Matsikure akatanga kupomera Katsande mhosva yekudanana nemurume wake zvinova zvaakarambisisa pachibva pamuka bopoto.
Matsikure akabva atanga kurova Katsande nembama, zvibhakera nebhutsu kumeso nemudumbu zvikaita kuti akuvare.
Magwaro ekwachiremba akamurapa akaburitswa mudare seumboo.
Zvisinei nekuti Matsikure akati vakarwa naKatsande, dare rakamukona nemhosva yekurova mumhan’ari. “Handibvumi mhosva yandiri kupomerwa nekuti takarwa,” akadaro.
Online Reporter