admin
Ethel Ncube
KULENINA lelokitshini leMagwegwe North koBulawayo elikhandwe ngumkalo ligqoke isudu yalo yokuzalwa phakathi komtshova lincinda uluju lwemvelo lowindi, uMthunywa uyakuveza lokhu lamhlanje.
Imbedumehlwana le yenzakale ngeviki ephelileyo lapho uRachel Ndlovu etholwe ngumkakhe uLuckson Moyo ebhunyumunyu emtshoveni lowindi uMthabisi Nhlinziyo.
Iphephandaba likazulu lizwe ukuba uNkszn Ndlovu wendile kodwa uyajola lamanye amadoda.
UMthunywa uxhumane lesinye isakhamuzi uMnumzana Zimisele Donga oveze ukuthi uNkszn Ndlovu kakuqalisi ukuganga lokhu ngoba kaziphathanga.
“Kuhle ngoba uMnu Moyo uze wazibambela yedwa wazibonela ngawakhe amehlo. UMaNdlo kaqali ukuyalala emoteni kaNhlinziyo thina esinathayo lapha ezitolo sihlala simbona edlula eqonda ezimoteni lezi ntambama obekutshengisa ukuthi kukhona okutshaya amanzi phakathi kwakhe lowindi lo.
“Ngizwa ubuhlungu ngomngane wami, akulula ukuthola umfazi wakho elele lenye indoda uphinde uyengena laye engutsheni,” kutsho uMnu Donga.
Kuzwakale ukuba uMnu Moyo usebenzela phandle kwakoBulawayo ukuthwala abantu ebahambisa emaphandleni, ngaleso sikhathi engekho uNkszn Ndlovu uhle ahluthulele indlu ayelala emtshoveni.
Intatheli ikhulumisane lesinye isakhamuzi esithande ukwaziwa ngokuthi nguMnumzana Samson Gumede esasikhona ngesikhathi uNkszn Ndlovu etshaywa ekhitshwa emoteni oveze ukuthi babukela ukudla kwamehlo ngalelolanga.
“Kwakuntambama ngama-8 sibona uMnu Moyo ethi udinga umkakhe njalo wayesithi ucabangela ukuthi usemitshoveni ngamphelekezela lakanye wamthola elele esitulweni egqoke isudu yokuzalwa eloMthabisi.
“UMoyo ngalelolanga wathukuthela wamnqinda ngezibhakela lamampama umkakhe ngoba ethi umehlisa isithunzi.
UNhliziyo yena ebona ukuthi kwasekukubi wahle wadliwa ngumswenya,” kulandisa uMnu Gumede.
UMthunywa ukhulumisane loMnu Moyo ovumileyo ukuthi umkakhe wamthola enqunu elowindi womtshova.
“UMaNdlo ngambamba xhaka emtshoveni enqunu. Mina ngangivela emsebenzini ngathola endlini kungelamuntu lembiza engagezisanga ngathi ngiyabuza ukuthi angabe eyengaphi bangitshela ukuthi uyekubabakazi wakhe eLuveve ngamangala ukuthi nguphi lowo engingamaziyo.
Uqhubekele phambili wathi njengoba wayeseke wezwa udletshana lokuthi umkakhe uthandana lowindi womtshova wahle waqonda lapho imitshova elala khona.
“Ngasengike ngezwa udletshana lokuthi uMaNdlovu uthandana loNhliziyo kungakho ngathi ngifika engekho ngahle ngaqonda lapho alala khona elinde imitshova ngathola umkami ethandelane lowindi lo enjengokuphuma kwakhe esiswini sikanina.
“Ngathukuthela kakhulu ngoba uthandana lomuntu ongela ngitsho lendlu yokulala,” kuchaza uMnu Moyo.
Uqhubekele phambili eveza ukuthi yena wake wambuza waphika kodwa useze wambamba xhaka.
“Ngake ngamkhuza ngoba sebengincwebe indlebe ukuthi unkosikazi wami uyajola yena walandula. Kuyini esenze ihlazo elingaka?
“Into ayenzayo yiyo eyenza ngamtshaya ngathi ngiqeda kumtshaya wabaleka uphenduke ngoLwesibili. Iqiniso elikhona yikuthi uzabuyela kuNhliziyo azithathele umfazi lo abe ngowakhe, mina ngeke ngenelise ukuhlala laye, wehlule. Achithekile achithekile awasabutheki,” kulandisa uMnu Moyo.
Intatheli ibuye yaxhumana loMaNdlovu laye ovumileyo ukuthi okukhulunywayo kwenzakala.
“Umkami wangithola emtshoveni njalo lokho okwenzakalayo liqiniso njalo kwaphambaniseka, ngaxolisa,” kulandisa uNkszn Ndlovu.
Imizamo yokukhulumisana lowindi owatholakala loNkszn Ndlovu yehlule ngoba ucingo lwakhe belungangeni.
Online Reporter