Online Reporter
Abel Ndooka
MUIMBI wekuNigeria ane mukurumbira Osinachi Kalu Okoro Egbu, uyo vazhinji vanoziva saSinach, achauya kuzoridza muno muZimbabwe mwedzi unotevera, pachirongwa cheToday’s Woman Interdenominational Conference, icho chiri kurongwa nekereke yeZAOGA Forward in Faith Ministries International.
Dopiro reToday’s Woman richaitirwa kuGlamis Arena muHarare kutanga musi wa4 Gunyana kusvika musi wa6 mwedzi wakare.
Sinach, uyo anozivikanwa nenziyo dzakaita mukurumbira dzinosanganisira “Way Maker”, mumwe wevaimbi vachange vari pachirongwa ichi, icho chinounza pamwe chete madzimai kubva kunyika dzakatsaukana.
Today’s Woman conference director Dr Larvene Simukai, avo vakataura vakamirira Dr Eunor Guti, vanove ivo vakavamba chirongwa ichi, vakati Today’s Woman Interdenominational Conference yakavambwa nechinangwa chekusimudzira madzimai munyaya dzakasiyana-siyana dzeupenyu, dzinosanganisira kuvadzidzisa kuvamba mabhizimisi emaoko kuti vagozvimirira muupenyu hwavo.
“Chirongwa cheToday’s Woman chakavambwa naDr Guti nechinangwa chekudzidzisa madzimai akasiyana-siyana kuti agone kuzvimirira muupenyu, adzidze kuzvishandira nemaoko avo, saka chirongwa ichi chinobatsira zvikuru.
“Gore rino tine mufaro mukuru wokuti tichange tine muimbi ane mukurumbira pasi rose, Sinach, uyo achange achiimba, achitandadza pamwe nekuparidzira madzimai achauya pachirongwa ichi,” akadaro.
