admin
KAPUTENI wechikwata chenhabvu chemadzimai chemaMighty Warriors, Felistas Muzongondi, anoti ane chivimbo chekuti vachakatyamadza pasi rose apo vakakunda zvikwata zviri muboka ravo kumitambo yemaOlympics iyo ichatambirwa kuRio deJaneiro kuBrazil muna Nyamavhuvhu.
MaMighty Warriors ari muboka rine zvikwata zvinoti Canada, Australia neGermany izvo zvinove shasha mumutambo uyu. Asi Muzongondi anoti maMighty Warriors haasi kumbotya zvikwata zviri muboka ravo nekuti danho ravasvika rinotaridza kuti vave nyanzviwo mumutambo uyu.
“Hatinganyepe, kutarisa wega boka redu unogona kuvhunduka nekuti zvikwata zvatakapihwa zvihombe asi isu hatisi kutya uye tichazvirakidza kuti tave vahombewo munhabvu.
“Tiri muboka rakanakisa chaizvo, tinovimba kuti tichatamba nhabvu inonakidza zvikuru kumutambo uyu. Hatisi kuenda zvekungonzi taenda asi tiri kuenda kunohwina,” anodaro Muzongondi.
Parizvino maMighty Warriors akambobuda mukembi zvichitevera kutamba kwavakaita mutambo wehushamwari neSouth Africa musi wa15 Chivabvu uye anotarisira kuzodzokera munguva inotevera kuti achitanga gadziriro dzekuenda kuBrazil.
Vatambi vazhinji vari kuita gadziriro dzavo vari kuzvikwata zvavanotambira.
Muzongondi anoti chikwata chavo chiri kuda zvakanyanya kutamba mimwe mitambo yehushamwari yakawanda nezvikwata zvikuru segadziriro dzavo.
“Parizvino tiri kuita gadziro dzedu tiri kuzvikwata zvedu zvakasiyana takamirira kudzokera mukembi.
“Tiri kuda chaizvo mimwe mitambo yakawanda yehushamwari kuti tizvitarise matambiro edu tisati taenda kuBrazil,” anodaro Muzongondi.
Online Reporter