admin
Bongani Ndlovu
UMCULI wakuleli olodumo kumculo we-rhumba oqhunsa ingoma zakhe ekweleSouth Africa, u-Allen “The Ghost’’ Ndoda usekuphindile njalo adume ngakho ukuhwatshela abalandeli bakhe idlalade elitsha elilesihloko esithi Wayawaya 14 ilifalami.
Lelidlalade ngelesi-23 selokhu waqalisa ezomculo.
UNdoda uthi njengoba kungasensuku zatshwala ukuthi ikhefu leKhisimusi lifike, uzulu uzagida aze aginqe amazwane nanko phela idlalade leli livutha umlilo.
Idlalade lakhe leli liphekwe kweleSouth Africa kumastudiyo abizwa ngokuthi Fred Studios njalo liqukethe ingoma eziyikhombisa ezithi: Ng’zoqala eTsholotsho, Sthandwa Sam’, Ilifa lami, Asizondi Muntu, Ama Society, Seng’thembele kumdali lo Number one.
UNdoda uqhweba isigxingi ngobunono obuphezulu kukanti ngomunye wabahlabeleli besiKalangeni olelizwi elihlabusayo njalo ukhokhela iqembu elaziwa ngokuthi The Challengers.
Umhlabeleli lo ubikele iphephandaba likazulu ukuthi idlalade lakhe likhuluma ngothando lwabazali ebantwaneni babo.
“Abantwana babalulekile yikho ngicula ngisithi ilifa lami. Wonke umzali uqakathekisa umntanakhe njalo ufuna ukumtshiyela ilifa.
“Uthando yilo ilifa thina njengabazali esingalitshiyela abantwabethu,” kutsho uNdoda.
Ukutshengisela ukuthi uyabathanda abantwabakhe abangamawele ubafake kukhasi ledlalade lakhe ukuze uzulu ozathenga lelidlalade ababone.
“Lami njengomculi ongumzali ngifisa ukutshiyela abafana bami uBrendon loBrian ilifa elihle elizabaphathisa kwelakusasa.
UNdoda uthi uzabambisana leqembu eligida kujabule abantu koBulawayo eleSungura Masters kuma-shows azawenza kusukela ngoMpalakazi. Uthe ufuna ukuvezela abantu into yamehlo lokuthi yena leqembu lakhe bawubamba njani umsebenzi wabo ngesikhathi behamba besethula idlalade labo leli.
“ISungura Masters liqembu engilithakazelelayo kakhulu ngoba bayazi ukugiya kungoma zami.
“Sikhangelele ukucula koBulawayo, eNkayi leHwange ngekhefu leKhisimusi. Ngifuna abantu bawujabulele umculo wami ikakhulu idlalade leli elitsha,” kutsho Ndoda.
UNdoda, owaqalisa ezomculo ngo1990, uqhubeka esiba lodumo njalo uthakazelelwa ngabanengi kweleZimbabwe jikelele ikakhulu ebesiKalangeni lapho aselodumo olumangalisayo.
Online Reporter