Online Reporter
Nkosilathi Sibanda
UMCULI wakoBulawayo odume ngelithi “Bhila” ubika ukuba uphezulu komkhankaso wokukhuthaza ukuthandana, nanko ulindele ukuthi ethule ingoma entsha ethi Wamuhle.
Ingoma le, ikhuluma ngobuhle bowesifazane njalo itshengisa ubungcitshi bukaBhila lothando lwakhe lokwenza umculo okhuthaza uthando lethemba.
UBhila, olebizo lokuzalwa elithi uPatriach Welcome Joel Manyambi uthe ingoma yakhe isitholakala emakhasini obulembu lasenkundleni zokuxhumana zakulezinsuku.
NgoMpalakazi odluleyo, uBhila wayiqhunsa ingoma yakhe emcimbini we-Ubuntu Culture Night eBulawayo Theatre, kwabancane indawo. Ababekhona bakholisa ukuyizwa iculwa ngendlela ehlukeneyo njalo bavuma ukuthi umculi lo ulesiphiwo sokuthokozisa abantu.
“Laphakathi kobuhlungu uthando luhlala luyisihluthulelo sokwelapha lokuvusa inhliziyo edabukileyo,” kutsho uBhila.
“Uthando luhle, ngakho ngiqala ikhalenda lami lomculo ngengoma ekhuluma uthando. Ingoma, Wamuhle, ngiyihlabela ngincedisana laMaculo Enjabulo, iqula labahlabeleli eliyinsika ekukhuleni kwami kwezomculo.
Ukusebenza labo kumqoka ngoba siyimuli inye.”
UBhila usephenduke waba yintandokazi kubalandeli bomculo koBulawayo laphetsheya kwelizwe.
Wakhipha idlalade lakhe lakuqala, Iphephandaba, njalo ulengoma ethi ethi, GP, eyake yatshisa emsakazweni.
Enye ingoma yakhe eyasabalala yathandwa ngabantu ngethi, Mathapelo. Ingoma le ithakazelela abesilisa abazimisela ukubhadala amalobolo batshade. Ividiyo yalingoma ilenduna uDakamela.
Njengomculi osebone okunengi empilweni, uBhila uthe wananzelela ukuthi ukuze ethule ingoma ezimnandi, kumele abekezele.
“Ukujaha ayisikho kufika. Umsebenzi wokuthokozisa abantu ufuna ukuthi ubelokubekezela, uthole inkuthazo lokufundiswa yilabo abaphambili.
