Online Reporter
Zintatheli zikaMthunywa
KULEMPI enzima esiqintini seNsuza, esabelweni seMatabeleland North lapho okulezakhamizi ezibika ukuthi zincintshwa ukudla okuvela kuHulumende ngenxa yokuthi kulokudonselana phakathi kobukhokheli bakule indawo.
Ukungezwani lokhu sekudale ukuthi uMlisa amise ukusebenza kwabo sobhuku, uMnumzana Mehluli Mpofu kusigaba sika-4C loMnumzana Richard Ngwenya ku-4B.
UMlisa lo nguMnu Edward Ngwenya, ongaphansi kwenduna uDeli.
Izakhamizi ezilesikhalazo zakhele esigabeni sika-4C, ngaphansi kukasobhuku uMnu Mpofu. Zibika zihlengezela inyembezi ukuthi zivalelwe phandle ukuthi ziphiwe ukudla ngoba kuthiwa uMnu Mpofu akumelanga abe ngumkhokheli wazo.
Ukudla lokhu kubalisa irayisi, esinikezwa izakhamizi endaweni zonke zelizwe. Isisusa saloludaba yikuthi kubangwa isikhundla lesi njalo izakhamizi zitshelwa ukuthi kumele zibe ngaphansi kwesigaba sika-4B, ukuze zithole ukudla.
Iphephandaba likazulu kade lilandela loludaba njalo intatheli zanxuswa emhlanganweni lezakhamizi.
Umhlangano lo ubuzama ukuthi wethule izikhalazo zezakhamizi kunye lokuxazulula udaba lokuncintshwa ukudla.
Kwabikwa ukuba isizatho sokuthi izakhamizi zika-4C zivinjelwe ukuthola ukudla yikuthi usobhuku ka-4B, uMnu
Ngwenya kafuni zikhokhelwe nguMnu Mpofu.
Osobhuku laba bangaphansi kwenduna uDeli.
Kulumhlangano, bekubuthene izakhamizi ezingafika amatshumi amabili.
UMthunywa ukhulumisane losobhuku uMehluli Mpofu obike ukuba yena wakhethwa ngabantu.
“Mina ngakhethwa ngabantu yibo abangifakayo njalo mina ngiyahlukumezeka ngoba ngiyabizwa kuthiwe sengikhitshwa ukuba ngusobhuku kodwa mina ngagcotshwa, icala lami lokuthi ngikhitshelwani angilalazi,” kubika uMpofu.
UMlisa ongaphansi kwenduna uDeli, u-Edward Ngwenya uthe:
“Ngiyavuma ukuthi ngimise osobhuku ngezizatho ezithile engingeke ngilitshele zona. Osobhuku laba bona bagijimela kumaphephandaba ukuthi kutheni. Khathesi ngisasebenza. Bazabuyela nxa kufanele babuyele.”
Omunye wezakhamizi ku-4C, uMnu Misheck Jubane uthe bazwa ubuhlungu ngesiphatho ebasitholayo.
“Iminyaka yonke sikhulile sinje besihola ukudla kakuhle, khathesi sebesincitsha. Siyabuza ukuthi kuhambanjani.
Usobhuku silaye lapha sisebenza laye kuhle asilahlupho kodwa isigaba sika4B senza ukuba thina singaphatheki emoyeni ngoba bethi usobhuku wethu abamfuni,” kubika uMnu Jubane.
UNkosazana Elsie Ncube ongomunye wezakhamizi zesigaba sika-4B uthe udaba lokulwisana kwenkokheli zabo lubabisela emuva.
“Sasuka le, ku-4B ngoba sibanengi. Sahlala lapha, kwabekwa usobhuku. Kuyasimangalisa nxa sekuthiwa singalandeli usobhuku wethu. Yikudlala ngempilo zabantu.”
