Online Reporter
Bhekimpilo Tshalibe
KULENINA elileminyaka engu-45 leKwekwe okubikwa lafumbathiswa imali ngomunye umphurofethi odumileyo kuleyondawo ukuthi liyezenza umthakathi enhlane ngenhloso yokuba umphurofethi abe lodumo.
Amapholisa esabelweni seMidlands abophe inina leli ebelizenza umthakathi, uRevai Kweza (45) ovela eMkoba eGweru kunye lomphurofethi obemfumbathisile uMadzibaba Brighton ‘Heavynisher’ Muroyi (19) ebasolwa ngecala lokubangela ukungahlaliseki emphakathini mhlaka 17 Nhlolanja kuwonalo umnyaka.
Kuzwakale ukuthi ababili laba beluka icebo labo leli, umphurofethi wabhadala inina leli imali yokuthi ayezenza umthakathi, lapho atholakala khona ehlezi phakathi kwenye indlu eseMbizo kuPhase 3 igedi likhiyiwe.
Indlu lapho okwatholakala uKweza ehlezi khona iseduzane lalapho umphurofethi lo athandazela khona ebandleni elibizwa ngokuthi yiJohane Masowe eChishanu Apostolic Faith Sect Shrine.
Kubikwa ngesikhathi bethola uKweza wayegqoke i-skin tight esimnyama, ibhodi emnyama kanye leqhiye emnyama. Kubikwa ixuku labantu lahamba layabuthana kuleyondlu okwakubonakale “umthakathi” andubana kubizwe amapholisa ukuze azochwayisisa ngendaba le. Ekuchwayisiseni kwamapholisa yikho lapho uKweza abhoboza khona ithumba waveza ukuthi babeluke icebo leli lomphurofethi lo. Obunye ubufakazi batholakala kungxoxo kaKweza lomphurofethi uBrighton Muroyi kuWhatsApp. Abathathu laba balindele ukuthi bayethonisiswa emthethwandaba. Isikhulumi samapholisa uInspector Mahoko ukhuthaza uzulu ukuthi azisebenzele ngezandla zakhe kumbe asebenze ukuze ethole ukuphila.
“Sikhuthaza abantu ukuthi bezisebenzele ngezandla zabo ukuze bethole ukuphila. Sithanda ukukhuthaza abantu ukuthi nxa befuna ukuyabuza kubaphurofethi baqale badingisise ngabo ukuthi bazingxenye zenhlanganiso zabelaphi besintu ngoba inengi labo bangamagwelegwele njalo bayabe befuna ukutshontshela abantu,” kuphetha uInspector Mahoko.
