Online Reporter
AKWALIWA ukuthi uzitholele iziphuzo zakho ngoba vele lasendulo abantu babethi ngesikhathi sokukwejisa banathe utshwala babo besintu. Okubi yikuthi umuntu enganatha athi sewasuthi amabele aqale ukuphambana lazo ehluphana labanye abantu.
Kukanengi sisizwa ukuthi bakhona abasemthethwandaba ngamacala okutshaya abantu bedakiwe. Kukanengi sisizwa ngezenzo eziphica imkhumbulo eyenziwa ngabantu nxa sebekhelele uMagwebu.
Abanye bayabulala abanye njalo benze ihlazo umuntu athi nxa utshwala sobuphelile ekhanda ale embe phansi icala ayabe eletheswa. Konke lokhu kuyabe kuveza mgceke ukuthi utshwala buyabe bukwala.
Kuphephandaba lakule iviki silendaba yenye indoda yeGokwe eyafika endlini phakathi kobusuku idakiwe yavusa umkayo yathi kabuyele kibo imsola ngokungathembeki. Indoda le yathi izama ukutshaya umkayo ngehloka yalaluka isihlahlele umntwana oleminyaka emine wafa.
Isidale icala leli yangena iganga yazama lokuthi izibulale kodwa yatholakala ingakafi.
Utshwala kuhle ukuthi umuntu abunathe ekholisa hatshi esenza okubi. Bakhona njalo abanye abatshayela izimota bedakiwe bayinyathele ngamandla, kambe uyabe ucabanga ukuthi imota ingayekela ukuwa nxa uyivuthela ngamandla otshwala.
Kukanengi sisizwa ngabatshayeli abalimaza abantu ngesizatho sokutshayela bedakiwe.
Mahlabezulu kumele sazi ukuthi nxa sinatha sicina ngaphi lokuthi lobotshwala sibunathela ngaphi ngoba abanye ngabanatha utshwala emsebenzini bazithole sebephambanise okunye baxotshwa umsebenzi.
Utshwala bulungile kodwa nxa sudakwa emsebenzini uthi abaqhatshi bakho bekele njani ukukuxotsha.
Abanye ngabadakwa uzwe umuntu sokuthiwa udlwengule usane usuke uzibuze ukuthi kanti utshwala bakulezi insuku sobehlukene njani lobabunathwa ngobabamkhulu ngoba kukhulu esikubona lapha phandle. Abanye njalo ngabahamba bezikhulula yonkana nje indawo bengaboni cala. Kambe bathini abantwana nxa sebeyabona abantu abadala behamba nje bezihlambaza? Asibunatheni sibuthela amanzi Mthwakazi.
Singenzi okubi sivike ngotshwala, singenzi ingani utshwala bubi ngenxa yezinto ezenziwa ngabantu nxa sebekhelele uMagwebu, singasukeli utshwala. Umuntu uyabe ezibona ukuthi wenzani, kungani esenza izinto abesethi ufuna ukuzenza engakadakwa? Uzezwa umuntu esithi ngifuna ukumdakelwa. Utshwala asobokufihla izinto ezilihlazo, asobokukhipha inhloni kodwa ngobokuzijabulisa. Ngoba ungabunatha ukhiphe ulimi uzalimala, uzisole kusasa impilo yakho siwonakele.
Kuqakathekile ukuthi udakwe unanzelela ukuthi impilo yakho iyangaphi ngoba ungenza amawala uzacina susenkingeni.
