Online Reporter
Brandon Moyo
UMONGAMELI weZimbabwe Rugby Union (ZRU) uLosson Mtongwiza useveze ukuthi iqembu lesizwe labadala ku-rugby lizakuba lamalungiselelo angcono kulawo wonke ngaphambi kwemidlalo ye-Africa Cup ka-2025, ezabe ise-Uganda ngoNtulikazi.
I-Africa Cup ezayo izandulela inkezo yomhlaba ka-2027, i-Sables ezalwela ukuvikela indawo yayo emqhudelwaneni lo ozadlalelwa e-Australia. Lokhu kuzabe kungokwakuqala ukuncintisela inkezo yomhlaba kusukela ngo-1991.
UMtongwiza ukhulume lokhu ngesikhathi elengxoxo leZimpapers Sports Hub koBulawayo. Inkokheli le ibivakatshele kulelidolobho izebukela umdlalo obuphakathi kwe-Old Miltonians leMatabeleland Warriors eHartsfield Rugby Grounds ngoMgqibelo.
Umkhokheli weZRU lo ugcizelele ukuthi kulemizamo ephezulu kumalungiselelo eqembu lelizwe ukuze babelesiqiniseko sokuthi uhambo lokuya e-East Africa luzakuba yimpumelelo.
“Amalungiselelo aseqalile. Abafana baqinisa imizimba. Ngenyanga kaNhlolanja balolonge amalanga amanengi, begijima labaqeqetshi kabili ngeviki. NgoMbimbitho, bazancintisa kunkezo yeNedbank Challenge njalo bazadlala leZambia ekhaya layo.
“Bazadlala leBotswana, i-UAE leqembu leMelika kuhlandla lama-Under 23. Ngaleso sikhathi sizabe sesikulungele ukuya e-Uganda. Sisazi kahle isimo esiyakuso njalo sikulungiselele. Abadlali benza konke okusemandleni abo ukuthi nxa befika e-Uganda kungabi lokuphazamiseka kohlelo lwethu lokulungiselela,” kutsho uMtongwiza.
Kumaviki amabili adluleyo, kukhethwe amaqembu azadlala ku-Africa Cup, lapho iSables ebekwe ndawonye lamaqembu aphezulu e-Africa — iMorocco, Kenya le-Uganda. IZimbabwe ingena kulumqhudelwano ohlelwe mhlaka 20 kusiya ku28 Ntulikazi. Kumdlalo wakuqala izadlala leMorocco, iqembu elinqobe ku-Africa Cup Repechage.
Kuqoqo lesibili kuzakuba lomdlalo omkhulu phakathi kweKenya le-Uganda. INamibia izaqala ngokudlala leSenegal, kuthi i-Algeria idibane le-Ivory Coast.
IZimbabwe yadlala kuWorld Cup ngo-1989 lango-1991 phambili kokuba bedlulwe yiNamibia kulumncintiswano.
