admin
Thokozile Mbedzi
KULEZELAMANI zesigabeni seDanyuwa koGutu ezimangalise abantu ngemva kokuba zibhuqane kwaba luthuli kwaze kwaba lesidumbu phansi kubangwa ilifa lamazenge.
Kubikwa uAdmire Mabvuu oleminyaka yokuzalwa engu-35 ulande umnawakhe uPaul Mabvuu oleminyaka engu-24 mhlaka 4 Mpalakazi efuna amazange atshiywa nguyise ngesikhathi ebhubha.
Ekhuluma lentatheli kaMthunywa uMnumzana James Dube uthe kabakaze bakubone lokhu.
“Lokhu okunje kangizake ngikubone kuyethusa. Abantu bonke esigabeni sethu bamangele ngikhuluma nje.
UAdmire wasuka emzini wakhe wayalanda umfowabo emzini omkhulu lapho okulamazenge ayetshiywe ethengwe nguyise wabo.
“Kukhanya uAdmire impendulo ayithola kumfowabo embuza ngamazenge kazange ayithande kungakho wahle waqala ukumtshaya waze wamwisela phansi wamfithizela uthe ephunyuka lapho wabaleka waqonda entabeni eseduze langakibo,” kulandisa uMnu Dube.
Uthe uAdmire wathi elandela uPaul wadobha amatshe waqala ukumjikijela unyawo lwesandleni sokunxele kunye lehlombe. Kubikwa ebona ukuthi uselimele wabuyela ngekhaya lapho afika wathwalelwa ekilinika yeChechiri.
Kuvele ukuba wathi elokhu esalinde ukwelatshwa ubuhlungu bamanxeba bamkhulela wedlula emhlabeni.
Isikhulumi samapholisa eMasvingo ulnspector Kudakwashe Dewa uthe bachwayisisa udaba lwezelamani ezalwa zibanga amazenge.
“Udaba lwamadoda alwe ebanga amazenge solufikile ehofisini yethu. Sixwayisa uzulu ukuthi atshiyane lomkhuba wokuxazulula ingxabano ngokulwa kabadinge abantu abangaba phathisa ukuze baxazulule ingxabano,” kuphetha ulnsp Dewa.
Online Reporter