admin
Thokozile Mbedzi
Zilokhu zitshe amathe izisebenzi zeThula 3 Mine Compound esigabeni seGonka eNkenyane kulandela ukuzwa ngezinye zazo ezitshaywe ngumbane zizama ukubamba amathendele.
Kubikwa izisebenzi lezi ezileminyaka engu-18 yokuzalwa zathi zitshayisa emsebenzini mhlaka 6 Mpalakazi zathatha imijibila yazo zayathiya amathendela lapho ezahlangana khona lengozi le.
Ekhuluma lentatheli kaMthunywa uMnumzana Somandla Mabhena uthe lokhu emadolonzima ngamashwa abehleleyo.
“Silokhu singelamandla, abafana laba bathi betshayisa basuka njengensukwini lemijibila yabo besiyathiya amathendele.
“lsimanga saba yikuthi kabazange baphenduke kwaze kwaba lusuku olulandelayo.
“Ekuseni mhlaka 7 sahle saqoqana sonke esisebenza lapha ukuze siyebadinga lakanye wonke umuntu wahle wasukumela phezulu saphuma. Sithe sesihambe umango ongatsho lutho ongaba yi-30m sisuka entubeni yenkomponi yethu sahle sabona isihlahla sephane sitshile amahlamvu sonke sahle sathi nhlo kuso sabona omunye wabo elele ekhangele phansi esopha emlonyeni lemakhaleni, inyawo, intamo lesandla kutshile.
“Omunye wakhe laye wayelele eduzane khonapho. Sonke sahle sayifunda ivaliwe ukuthi inkosazana yonile,” kulandisa uMnu Mabhena.
Isikhulumi samapholisa koBulawayo uInspector Abedinico Ncube ebuzwa ngodaba lolu uthe solufikile ehofisini yabo.
“Udaba lwadoda amabili atshaywe ngumbane solufikile ehofisini yethu.
“Njengoba sokuyisikhathi sezulu sithi uzulu kaqaphele ngaso sonke isikhathi ukuba engacatsheli izulu ngaphansi kwezihlahla loba ukuba segcekeni ngoba bengehlelwa yingozi,” kuphetha uInsp Ncube.
Online Reporter