Online Reporter
Yintatheli KaMthunywa
KULENINA lakoMutasa elimangalele uninazala lithi uyalithakatha, njalo lobu buthakathi yibo obubangela ukuthi liphume izisu kanye lokuhlanza igazi okungapheliyo.
Lezinsolo ezethusayo ziqale ingxabano embi phakathi komdeni, okuhlanganisa ezobuthakathi kanye lokungazwanani ngenxa yempahla.
Udaba lolu lulethwe enkundleni yenduna uMutasa ngempelaviki, lapho u-Annatoria Mutuza, umnakekeli omdala wepulazi lomdeni, azivikele khona kuzinsolo azetheswa ngumalukazana wakhe, uSarudzai Chitsviki.
UMutuza ubikele inkundla ukuthi uChitsviki ummangalela nje uthi “udla abantwabakhe abangakazalwa” lokusabalalisa amahungahunga okuthi wathakatha umama omzalayo.
“Umalukazana wami uthi ngingumthakathi odla abantwabakhe abangakazalwa. Ulohlupho njalo lokuhlanza igazi, njalo engimangalela ubesithi yimi engibangela konke lokhu,” kutsho uMutuza.
Ngokutsho kukaMutuza, uChitsviki lomdeni wangakibo bavakatshela inyanga yeHarare, okuthiwa yafika yaqinisekisa ukuthi nguye obangela ukugula kwakhe.
“Uhamba etshela abantu ukuthi sengathakatha ngabulala abantu abanengi emulini,” kutsho uMutuza.
UChitsviki usukume wathi ukholwa ukuthi uMutuza nguye omloyayo ngoba inyanga yakuqinisekisa lokho.
Uphinde waveza ukuthi ukungezwani phakathi kwakhe lomsolwa kwaqala esanda kwenda.
“Ngisanda kwenda, uMutuza wayengithwalise amagabha avuzayo. Wangitshela ukuthi amanina amabili ngeke azwane nxa ehlala emzini owodwa kungakho-ke lami kumele ngihlukunyezwe ngoba laye wahlukunyezwa nguninazala esanda kwenda. Wayengitshela ukuthi lami kumele ngihlupheke ngendlela efananayo,” kutsho uChitsviki.
UChitsviki uqhubeke wathi ngaleso sikhathi uMutuza emhlasela, wayethi nguye obangela umnyama ekhaya, okwamenza wayadinga usizo kusiyazi.
“Wayethi angangihlukumeza ngitshele umkami, ahle eqele phezulu etshele umkami ukuthi mina ngithe ungumthakathi.
Ngacina ngimbiza ngokuthi mthakathi ngemva kokuba engitshele ukuthi wacatshwa emzimbeni wakhe okuyikho okwenza amadodakazi akhe angendi. Wayesithi ulaso isifiso sokuthi ukucatshwa lokhu kungathathi imizi yamadodakazi akhe kungakho wayefuna kususwe. Sengihlala ngihlanza igazi kusukela ngo-2020, njalo ngikholwa ukuthi nguye okubangelayo,” kutsho uChitsviki egcizelela.
Uqinisekise ukuthi wabuza inyanga ngalokhu yamtshela ukuthi uninazala nguye obangela inkinga zonke empilweni yakhe.
“Ngike ngayabona inyanga lomkami lomfowethu, yafika yasitshela ukuthi konke engikhala ngakho kubangelwa ngumamazala, engingazwani laye,” utsho njalo.
UChief Mutasa ubuze ukuthi uChitsviki wake wayabona odokotela ngokuphuma kwezisu okuphindaphindayo lokuhlanza igazi waphendula wathi yebo kodwa odokotela ababoni lutho.
“Yebo, ngahamba esibhedlela, kodwa odokotela behluleka ukuthola ukuthi ngibulawa yini. Yikho ngavumelana lalokho engakubikelwa yinyanga,” uchasisa kanje. Esehlulela, uChief Mutasa weluleke uChitsviki lomkakhe ukuthi basebenzise zonke izindlela zokwelatshwa ngaphambi kokuthi bethembele kuphela ekubuzeni izangoma.
“Kumele libuze odokotela abangcono lithole uncedo oluqondileyo. Ngemva kokuthi seliphelelise indlela zokwelatshwa yikho lapho okumele lidinge khona izangoma.”
Inkundla iphinde yezwa ukuba ingxabano le ihlangene lodaba lwempahla.
UMutuza watshiyelwa ipulazi lomdeni kwathiwa nguye ozaligcina. Ipulazi leli ngelabazali bomkaChitsviki labafowabo ababhubha abantwababo besesebancane. UMutuza kwakukhangelelwe ukuthi uzanikeza abantwana ipulazi labo bangakhula kodwa kukhanya kasafuni ukukwenza lokho.
“Udaba lolu alusilo lobuthakathi kuphela; luphinda lubemayelana lomhlabathi lempahla eyatshiywa esandleni sikaMutuza okweminyaka. Kumele uthuthe kulumuzi uvumele abantwana bomfowenu ukuthi baphathe ipulazi labo,” kutsho uChief Mutasa.
Uphinde wakhuthaza umdeni ukuthi udinge usizo kumabandla ezokholo kwesulwe igama likaMutuza njengoba eqinisekisile ukuthi kayisuye obangela ukuphuma kwezisu lokuhlanza igazi.
“Isiqondiso senkolo siqakathekile endabeni le, kodwa kumele sihlanganiswe lezixazululo ezingenzeka. Kumele uthuthe kulumuzi. Abantwana owawucelwe ukuthi ubanakekele khathesi sebekhulile njalo bayazikhulumela,” kuphetha induna.
