admin
Ethel Ncube
KWEHLE iyezi elimnyama esigabeni seMakwazu, eTsholotsho ngemva kokuba esinye isakhamuzi obekucatshangelwa ukuthi sithethwe yinjuzi edamu sitholakale sindenda phezu kwamanzi.
Isiga lesi senzakale ngenyanga ephelileyo lapho uNkosazana Similo Dube esuke egijima waqonda edamu wahle wacatsha emanzini kwahlala iviki engabonakali.
Ekhuluma lentatheli omunye wezakhamizi zakule indawo uNkosazana Lethokuhle Ndlovu uveze ukuba ukufa kukamuyi kubatshiye bemadolonzima.
‘‘Umama lo nxa belandisa abantwana bathi wasuka ekhaya egijima eqonda edamu kanti uzacatshela khona. Wangena emanzini wanyamalala kazange aphinde abonakale, abantu bahlala khona edamu kutshaywa ingungu becabanga ukuthi uzaphuma kwehlula, bacina bebiza abakibo.
‘‘Abakibo yibo abafika bathi emfuleni lapha akusale izalukazi labantwana abancane kuhlatshelwa. Labantshezayo abadinga abagalulileyo labo basebedinge umzimba kamuyi baze bakhalala. Kuthe sokusiyaqala iviki yesibili watholakala eceleni nje kwedamu esethule njalo engonakalanga endenda emanzini,” kubika uNkszn Ndlovu.
UMthunywa uxhumane lomunye wabakhokheli bezigaba uNkosazana Thandiwe Ngwenya ochaze ukuthi kuliqiniso ukuba kulomama owatholakala efile eceleni kwedamu,
“Umama lo wafa kabuhlungu kakhulu, abantu bathatha iviki yonke besedamu behlabela betshaya ingungu bethi nxa ethethwe yinjuzi uzaphuma kodwa kazange abonakale.
“Kuthe ngeviki yesibili watholwa ngomunye ubaba owayethinta imbuzi zakhe eceleni kwedamu. Abambonayo esethule bathi okwabadidayo yikuthi wayengelanxeba ngitsho njalo umzimba wakhe ungonakalanga,” kutsho uNkszn Ngwenya
Iphephandaba likazulu lixhumane lenduna uGampu ovumileyo ukuba indaba enjalo yenzakala,
“Mina ngezwa sengitshayelwa ucingo sokuthiwa umama usebhubhile, ngokutsho kwabo bathi bamdinga emanzini bamswela bafonela abakibo. Abakibo bathi befika bathi angabe ethethwe yinjuzi kungakho kumele kulandelwe isiko lakhona uzabonakala. Kwalalwa edamu kuhlatshelwa kodwa ngemva kweviki wayelokhe engakabonakali. Kubikwa wazatholakala sokusiyangenwa kuviki yesibili endenda emanzini,” kuphetha induna uGampu.
Online Reporter