Online Reporter
UKHUMBUZE abadlali bakhe ngobumqoka bokubambelela umqeqetshi we-Orlando Pirates, u-Abdeslam Ouaddou, nanko ezakhe zisembangweni wesicoco seBetway Premiership otshisa phansi leMamelodi Sundowns.
EZimnyama zinqobe iTS Galaxy nge 6-0 kowePremiership ngeSonto, eMbombela Stadium, eNelspruit.
Ukunqoba kwePirates kuyibuyisele esiqongweni selogu yePremiership ngemiklomelo engu-51, ilandelwa yiMamelodi Sundowns ele-50. EZimnyama sezihlohle angu-40 emidlalweni engu-22. ISundowns itshaye umambule amahlandla angu-37 emidlalweni engu-21.
ISundowns isele emuva ngomdlalo ezawudlala leDurban City mhlaka 7 Mabasa, eThekwini.
“Ngibatshelile abafana ukuthi akukapheli (ngesicoco seligi). Sizolwa kuze kube sekupheleni kwesizini, ngemuva kwalokho sizabona ukuthi kwenzekani,” kutsho u-Ouaddou.
Ukuhlohla amabhola amanengi kwePirates emdlwalweni wayo leGalaxy yikho okumgeze igilo u-Ouaddou obekhala ngokwehlulwa ngamathuba kwabadlali bakhe emidlalweni edluleyo.
“Ngiyacabanga bekungokokuqala siqedela ngendlela inengi amathuba esiwakhileyo. Kubalulekile ukutshaya amabhola ngoba ekucineni angaba lusizo ekupheleni kwesizini.”
Loba u-Ouaddou ejabulile ngokuzinikela kwabadlali bakhe, kodwa uncome kakhulu uRelebohile Mofokeng otshaye amabhola amathathu kulumdlalo. Lokhu bekungokokuqala kusukela wakhutshulelwa eqenjini elikhulu ngesizini ka-2022/2023. Ngesizini edluleyo uthole umklomelo weBetway Premiership Young Player of The Season.
“Kubalulekile kuye kodwa, kubalulekile laseqenjini. Lokhu kuzakwenyusa ukuzethemba kuye, abone ukuthi usengakwazi ukudlala ezingeni eliphezulu.”
EZimnyama zizabuyela enkundleni ngemva kwekhefu leFifa leleNedbank Cup ngomdlalo wasekhaya leLamontville Golden Arrows mhlaka 7 Mabasa, e-Orlando Amstel Arena, eSoweto. —Isolezwe
