Online Reporter
UBHEKE akhalelwe amasongo kaSigonyela uthitsha athi utshaye indodakazi yakhe, maqede waxolisa nge-aphula.
Kulesi sehlakalo okuthiwa senzakale ngoLwesine, kulimale umfundi oleminyaka eyisitshiyagalolunye, ofunda uGrade 4 eSoul Primary, eJolivet eSouth Africa.
Unina kamgilwa, uNkosazana Sindi Dlamini, uthe umntwana ubuye esikolo, wagqoka isigqoko, ezama ukufihla ukuvuvuka.
Uthe ubonwe ngesinye isihlobo ukuthi ulimele, wathi uma ebuzwa, waqala wakhala engafuni ukutsho ukuthi kwenzakeleni. “Ngesikade, sengithetha, kube nzima etsho ukuthi utshaywe ngequpha ngumbalisi amqambe ngegama, omfundisa isifundo i-English Creative Art,” kutsho uNkszn Dlamini.
Uthe umtshele ukuthi umsolwa umtshayele ukuthi ubengayibhalanga i-date waphinda waxikiza okuthile ekhasini le-exercise lesikolo.
“Uthe umbuze ukuthi akadwebelile ngani, futhi uxikizeleni? Wabe emtshaya ngequpha ebusweni,” utsho kanje.
Uthe umgilwa uvele wavuvukala ngaso leso sikhathi esiphongweni, kwavaleka lelihlo, waveza lokuthi eqaphela lokhu, umsolwa umbizile umgilwa wamhlikihla, wase emkhiphela emnyango, ethi akayohlala ethoyilethi, abuye esepholile.
“Uqhube wathi akogeza ubuso ethangini lamanzi khona ezofika ekhaya esebohlile. Wamnika i-aphula ngesikhathi esegoduka,” kubeka uNksz Dlamini. Uthe ngokubona kwabo, uthitsha ubexolisa ngokuthi amuphe i-aphula.
Udalule ukuthi ulusukumele phezulu lolu daba, waya komunye uthitsha, omkhaphe baya emqatshweni kamsolwa.
“Sithe sifika kwavele kwacaca ukuthi uyenzile le nto ngoba uvele wangincitsha amehlo. Ngithe sengimbuza ukuthi uyilimazeleni ingane yami, wathi uxolisile kuyo,” kutsho yena. Uthe umvulele icala ngoba ufuna abotshwe.
“Akakufanele ukufundisa izingane zethu umuntu oziphatha ngale ndlela. Indodakazi yami ihlukumezekile, isithula ngokweqile, ebusuku ayisalali, izingane ziyihlekile esikolo ngosuku lwesigameko,” kutsho uNksz Dlamini.
Uthe emva kokufaka ezinkundleni zokuxhumana ngesigameko, kuqhamuke abanye abazali abathe lezabo izingane sezike zatshaywa kanzima umsolwa, kwaphinde kwaqhamuka nabanye othitsha abaveze ukuthi ulenkinga yokuba lolaka.
Okhulumela amapholisa KwaZulu-Natal, uConstable Thenjiswa Ngcobo, uthe amapholisa aseHighflats aphenya icala lokutshaya kulandela isigameko sokutshaywa kwentombazane (9) umsolwa owaziwayo ngoLwesine, eJolivet.
UMnyango wezeMfundo esifundazweni ubukhiphe isitatimende kwabezindaba ngeSonto, uthi udaba uyaluphenya futhi umsolwa uzothathelwa izinyathelo ezinqala uma etholwa elecala ngesehlakalo.-Isolezwe
