admin
Thokozile Mbedzi
NGENXA yobukhwele kulendoda yeMudungwe koChivi eMasvingo ethe ngemva kokufumana imlayezo evela kudlalicatsha kumakhelekhukhwini womkayo yanakana ukuhuga idlalicatsha lelo ngokuzenza umkayo efonini okwenze yacina ihlangana lalo yalibulala ngeviki ephelileyo.
Kubikwa uLaurey Tafireyi oleminyaka engu-25 yokuzalwa uthe ngemva kokuthola imilayezo yothando kumakhalekhukhwini womkakhe uBrenda Aino oleminyaka yokuzalwa engu-23 evela kwenye indoda wanakana ukuqila uJosiah Manatsa ukuze ahlangane laye ngokuzenza umkakhe kumakhalekhukhwini.
Ekhuluma lentatheli kaMthunywa uMnumuzana Bheki Tshuma oyisakhamuzi uthe indaba kaTafireyi lomkakhe ingundaba mlonyeni esiqintini.
“Lokhe simangele ngalokhu okwenzakale lapha. Okwakuqala okusimangalisileyo sisizwa ngodaba lolu yikuthi umka Manatsa angabe ebekhohlisana lalo osengumuyi kuthi okwesibili simangaliswe liqhinga likaTafireyi lokuqonda ukuqila umuntu aze ambulale kabuhlungu kangaka ngenxa yobukhwele.
“Ngokutsho kwabantu ngosuku lwesehlakalo lesi uTafireyi wafumana imilayezo kumakhalekhukhwini womkakhe eyayivela kuManatsa wahle wathatha umakhalekhukhwini lo waqala ukukhuluma loManatsa ezenza umkakhe.
“UManatsa laye ngokungazi waphendula ethi mhlawumbe yisimomondiya axoxa laso kukanti hatshi.
“Ekuxoxeni kwabo ngemlayezo bavumelana ukuyahlangana esibholaneni lakanye lokhu kwenzakala.
“UManatsa ngokungazi waphuthuma wayakhona esibholaneni wafika walinda kukanti kabuzanga elangeni,” kutsho uMnu Tshuma.
UTafireyi kubikwa wahloma ngengqamu waselanda uManatsa wafika wamgwaza wahle wafela khonapho. Ngemva kwalokhu watshayela umngane wakhe ucingo wambikela ukuthi usebulele uJosiah qede wacela ezinyaweni.
Amapholisa kubikwa sewambamba njalo uvalelwe.
Isikhulumi samapholisa esabelweni seMasvingo ulnspector Kudakwashe Dewa ebuzwa ngodaba lolu uthe solufikile kweyakhe ihofisi njalo uthanda ukukhuthaza uzulu ukuthi nxa kulenkinga okumele zixazululwe phakathi kwakhe adinge abangaphathisa hatsho ukuthatha umthetho awibeke ezandleni zakhe.
Online Reporter