admin
Thokozile Mbedzi
KULENDODA emangalise abantu elokitshini leNtumbane koBulawayo kulandela ukutshisa indlu yangakibo iphakathi ngemva kokuxabana leloja.
UNkululeko Mpofu oleminyaka engu-47 yokuzalwa utshise indlu yangakibo ngoMvulo kuyonale iviki kulandela ukuxabana leloja athi selizisondeza kakhulu kugogo wakhe ngoba lifuna ukuba yindlalifa..
Ekhuluma lentatheli kaMthunywa uMnumzana Naison Mpala uthe bona balokhu belesimanga ngendoda eleminyaka engu-47 ebanga ilifa likagogo walo ize itshise lendlu.
“Silesimanga silapha ngendoda engaka ebanga ilifa ize itshise indlu. Abanye ontanga bakhe balezindlu zabo loba imizi. Kambe ubengaze atshiye lendlu leyo laye ephakathi.
“Kuncede ukuthi iloja lelo lithe libona eseqala umsindo lahle laphuma endlini. UNkululeko uthe esesele uhluthulele izivalo watshisa amakhetheni iloja laselinanzelela ukuba sokulumathe umlilo labiza omakhelwane abafika bakwatula izivalo bakhupha yena kuphela impahla yonke yalobela phakathi.
“Ngenxa yesenzo sakhe lesi usehlukuluze ugogo wakhe okuphindiweyo ngoba efuna ilifa,” kulandisa uMnu Mpala.
Isikhulumi samapholisa koBulawayo uInspector Abednico Ncube ebuzwa ngodaba lolu uthe basaluchwayisisa.
“Uzulu nxa elenkinga kaxazulule inkinga ngendlela eqondileyo kulokusebenzisa udlame,” kuphetha uInsp Ncube.
Online Reporter