admin
Nkosilathi Sibanda
UHULUMENDE ukhathazekile ngokungenzi kuhle emihlolisweni kwezikolo ezisesigabeni seNkayi, njalo uthembise ukulungisisa lokhu kusetshenziswa uhlelo lwe-Education Sector Strategic Plan (ESSP).
Izinga eliphansi lokuphumelela ezikolo zeNkayi kuminyaka embalwa edluleyo kudale ukuthi uHulumende asebenzisane lequla lezikhwicamfundo eLupane State University ukuze kudingwe amacebo.
Abaphathintambo bakaHulumende bahlangane labaphathi bezikolo, amakomithi okuthuthukisa izikolo kanye labazali lapho okuxazululwe khona ukuthi umphakathi lababalisi kumele basebenze ndawonye.
Ekhuluma lentatheli yephephandaba likazulu ngeSonto, uMsekeli kaMphathintambo wezeMfundo ye-Primary le-Secondary u-Edgar Moyo uveze ukuthi uHulumende ubambisane labanye abathintekayo ukukhangela loludaba ukuze kutholakale izixazululo ezingaba khona.
“NjengoHulumende sikhathazekile ngempumela ezikolweni zeNkayi. Sesikhethe ukuthi kesikhulume ngaloludaba, sihlanganise amakhanda labaphathi, ababalisi labazali.
“Yikho nje sesicele ukuthi kube lokuchwayisisa okuzenziwa yiLupane State University ukuze kuhlaziywe lesi isimo,” kutsho uMsekeli kaMphathintambo wezemfundo lo.
Ummeli weNkayi North kudale lePhalamende uDokotela Sithembiso Nyoni uthe umphakathi wakulindawo ngeke usalele emuva lapho isizwe sithola ukufinyelela emfundweni esezingeni elifaneleyo njengokuphawulwe yiSustainable Development Goals (SDGs) leNational Development Strategy 1 (NDS-1).
“Wonke umuntu kumele abeyingxenye yombono kaMongameli okaVision 2030. Kuyinhloso kaHulumende ukuthi kungabi khona umphakathi osele ebumnyameni ikakhulukazi kwezemfundo lakwezempilakahle.
Lokhu kuxoxisana kuzaqinisekisa ukuthi abazali, abaphathi bezikolo loHulumende bayingxenye yokuletha impumelelo ezikolo,” ngu Dkt Nyoni lo.
UHulumende okwamanje uphezulu kokukhankasela ukusetshenziswa kohlelo lwe-Education 5.0 olujonge ukuthi abafundi bathathele phezulu izifundo zemitshina yakulezinsuku, lemisebenzi yezandla elakho ukuthi bavule amabhizimusi.
Online Reporter