admin
YiNtatheli kaMthunywa
UKELVIN Kaindu umqeqetshi omutsha weHow Mine uthe uyazi ukuthi ithimu yakhe ingemuva kumalungiselelo esizini yeCastle yalonyaka kodwa uzathatha isikhathi sakhe ukubumba ithimu elakho ukusukumisa abalandeli bezimbamgodi.
UKaindu utshiyane leqembu leTriangle ngomnyaka odluleyo ekhetha ukuphenduka koBulawayo, lapho acina ukuqeqetsha ekuHighlanders ngesizini ka2014.
Iphephandaba likazulu lixhumane lomqeqetshi lo osebhode amathimu amathathu lokhe wafika eZimbabwe.
“Akhona amathimu abengikhathaza kusukela kusizini edluleyo. Amathimu afuna ngiwasebenzele manengi kakhulu. Ngikhethe iHow Mine ngoba ngibonile ukuthi yiyo ithimu engingasebenza kuyo ngcono.
“Angisoli lutho lapho engivela khona. Ngivume ukuqeqetsha iHow Mine ngoba kuliqembu engikhwabitha ukuliphakamisa. Kulamaqembu sibili ayesithi azanginikeza imali enengi kodwa ngisuthisekile lapho engikhona okwamanje,” nguKaindu lo.
Ekhuluma eziqhenya, uKaindu uthe nxa esebumbe ithimu ayifunayo, ulakho ukuthi amangalise ngokubutha zonke inkezo.
“Ngihlangane labadlali njalo ngilokujabula ukuthi labo bazimisele ukuthi benze ngcono.”
UKaindu ungena kuHow Mine esazi ukuthi ulomthwalo wokuvuselela ithimu le ebiqeqetshwa nguLuke Masomere nyakenye. UMasomere watshiya umsebenzi ngenxa yokudliwa kwethimu. UMasomere wayeqale isizini ka2015 ngesivuvu ngokuthenga abadlali abadla ubhedu kunguqu kodwa abadlali laba akulalutho abalwenzayo enkundleni.
Isikhulumi seHow Mine uPaul MacAndrew uthe balethemba kuKaindu, okuyikhona okwenze bamnikeza umsebenzi eqenjini.
Online Reporter