Online Reporter
UMENDO
ISAHLUKO 11
UGugu simthola exoxa ekhaya loMaMlilo. Wayekhakhamele uMaMlilo ngezenzo zikaNdaba umntakaZulu. UGugu wayejonge ukuyamvalelisa uMaMlilo ukuze angaboni ngelika nya. UGugu wayengaselamhlaba lapha koZulu ngoba engasananzwa kanye lomntanakhe uSipho.Wazimisela ukuduka lelizwe ngoba engeke abuyela kwabo lapho uyise ayeqakathekisa imali yamalobolo asewayidla wayiqeda.
UMaMlilo wazama ukumbuza ukuba wayeluqondise ngaphi uGugu. Waveza ukuba ujonge ukuya eShabhani. Kwakunzima ukuba umntwana uzamtshiya ngaphi. UMaMlilo wabona kungcono amtshiye ekhaya, nanku bebanengi ababetshiywa ngonina. Laye- ke uSipho wayezakhula. Esengekhaya, uGugu wehlukanisa izimpahla zakhe lezikaSipho walungisela uhambo lwakusisa . Wakubona kulicebo elihle lokuba uMaZulu asale ebona kuhle izenzo zikaNdaba nxa esesondla uSipho. Ekuseni, wavuka kuhle esejonge esilindweni samabhasi. Wenza okokunyenya, etshiya okuSipho kusalele.
Esilindweni wathola kulesalukazi esasihamba lomzukulu waso owayengaba leminyaka emithathu. Esebone ingcino yengcekeza emntwaneni, uGugu wananzelela ukuba logogo laye wayencithika ngengcekeza. Akamangalanga esizwa bethi bahlose ukuya esibhedlela nanku umntwana wayetshiswe ngamanzi abilayo insuku ezintathu ezedlule. Babengcole angathi zingulube lababantu, umbala wezigqoko ungasakhanyi. Wethuka uGugu ebona ingalo yomntwana lo eyayibhonxulwe ngamanzi. Ugogo watsho lokutsho ukuba ubengeke ajaha atshiye amabele akhe echitheka kungelamuntu osala ewakhangela. Uthe esezuze ozasala kwayikhona ephakamayo emusa esibhedlela, belu unina akalandaba laye. Wamtshiya ethi uyadinga umsebenzi.
Isalukazi sasiphethe sithetha njalo sihlukuluza lolusane ngesiga sikanina ozala azephosela ekhaya insane lezi, abuye abuyele ethi uyadinga umsebenzi ahambe alobe. Ugogo wathi olunye usane lwasala kuye lulenyanga eziyisikhombisa. Lapho-ke wanyenya walutshiya engabikanga lakubika ukuthi uyahamba. Wasala edinga ugogo, wabona nya.
Lokhu kwamethusa uGugu. Wabona ukuhlukuluzwa kosane wacabanga owakhe uSipho. Walothuka kanye sekusala ukulalela ugogo. Wathatha okungokwakhe wabuyela ekhaya. Ekhaya, wahlangabezwa ngokuSipho sekukhale zoma kumdinga iguma lonke. UMaZulu wayengekho laye eye esigayweni. Waphanga wagoqozela okuliyambazi okungelalutho wanika okuSipho. Kwalikapula linjalo, sekuvele sekujwayele ukudlulisa iphango kungelandaba.
Wabuye wagoqa izimpahla uGugu, khathesi esezifaka zonke ebhokisini linye. Ekuqoqeni wabalenhlanhla wathola imadlana kusikhwama sikaSipho acabanga wabona iyiyo ayeyiphiwa nguThulani wayala. Wabonga uMlimu waba lesibindi eselemadlana le. Wacabanga ukugada aye kuMusa engaselandaba lokuba wayezathini embona efika losane. Waya kuMaMlilo wayachasisa khona ngenhliziyo emhlophe . Wake wazama ukumbonga ngedola kodwa wala uMaMlilo ngoba uGugu elohambo olukhulu abhekane lalo. Ntambama wavalelisa kuhle kuMaZulu. Kabuzanga lutho uMaZulu ecabanga ukuba uyabuyela kumkakhe uGugu. Kanti phinde.
