Online Reporter
Ugwalo: Umendo, Olulotshwe NguBarbara C Makhalisa
Isahluko 17
Sikhumbuzo Dabengwa
Ugwalo luyaqhubeka bafundi. Sihlangana loGugu loThulani sebelothando olwalungathi luyangezelelwa. Basebengabatshona bonke bexoxa ezitshisayo. Babexoxa langokuba umtshado kaGugu kwakumele uchithwe lanxa nje uGugu lokhu wayesiba lokukwesaba. Wayengathandi ukuba athathelwe isipho sakhe esinguSipho.
Wakunanzelela ukuba uNdaba wayengazange abonise ukuba ngumzali kuSipho. UThulani nguye owayemnanza njengomntanakhe uqobo. Njengoba isiNtu sisithi umntwana olotsholiweyo ngowendoda, wayezamthathelwa uSipho.
Lokhu yikho okwakumhlupha kakhulu uGugu, ebona ukuba uSipho wayezayaphila nzima enganakekelwa muntu nxa yena unina wayengesulisa umtshado. Babengamenza ulunya bamhlukuluze bekhawulisa yena unina. Wayeze acabange ukuzihlalela angendi ukuze azigcinele umntanakhe.
UGugu wayesebukeka esengowayesentshintshile.Labomakhelwane basebehlezi bembuza ukuba wayegcobani. Wayeseyisimomondiya. Kwasekuphelile ukuzaca njengejolikazi lenkomokazi engadliyo.Lesikolo babembuka. Izifundo zona wayezenza kuhle imihlolo. Wayezibuza ukuba lokhu kuntshintsha kwakubonisa indlela ayephethwe ngayo esasemendweni wakhe loNdaba.
KuThulani lapha wayeseyisigqigqimbana. Wakubona ukuba wayewudinga lumuthi ayewuswela empilweni yakhe. Abangane bakaThulani kuthiwa bancipha.
Isikhathi sonke uThulani wayesesichitha eloGugu loSipho. UThulani wazuza incwadi eyayivela kuNodumo esesiyaqala umsebenzi. Wathembisa ukuzathatha izimpahla zakhe.
UGugu wazama ukubonana lamagqwetha ezama ukwesula umtshado ukuze bamcebise kuhle. Esacabanga lokhu umlobi uthi kwehla isimanga esamqedayo mhla bevakatshile loThulani batshiya uSipho elele endlini bengakhiyanga umnyango. Babesithi basathi tshampu bayaphenduka. Ekuphendukeni kwabo uThulani wedlula etshiya uGugu.
Wathi esekhiye umnyango uGugu wabalesithuli ebingelelwa ngumuntu owayesendlini. KwakunguNdaba.
Wantela uNdaba embuza ukuba yikho ayekwenza uGugu ukubhoda lamadoda etshiya umntwana eyedwa endlini engakhiyanga lendlu.Kuthiwa wakhakhamala uGugu. Wamangala ebona ingcekeza uNdaba ayeyiyo yona.
Amazinyo ayemnyama, inwele zingezohlanya, zingakanywa. Izimpahla, izicathulo kwakungathi zidojiwe. Isikhewu esesabekayo. Indevu zona zazingathi ngezendoda yeZiyoni. Kwasekunuka endlini. Wayefike wakapula isitshebo embizeni wadla.
Wambuza uNdaba uGugu ukuba izimpahla ezazisendlini zazingezakhe uGugu kumbe zazingezamajaha akhe. Wamcela ukuba alumathise igwayi lakhe.
Kwabayikhona uGugu eqala ukunyikinyeka. Esenza lokhu uNdaba wayeqhunsa uhleko olunzima okwenza uGugu angathi wayehanjwa zinyoka zabafazi emzimbeni.
