Online Reporter
Ugwalo: Ukuthunjwa kukaSukuzukuduma olwalotshwa nguGeshom MP Khiyaza
Isahluko 6
USukuzukuduma wayesejayele ukukhelela ingqwele yalapha amanzi ngozipho. Wayebuyela kanengi-nengi ngapha ethintana lemihlambihlambi yezinkomo.
Zazingammeleli-ke izinkomo zihamba zize ziyengena emasimini abuye adliwe luswazi. Ngapha ngekhaya lakho wayesidla luklubhu. Wayezondakala ikakhulu kuMaGumbo owayemncitsha lokudla. Wahlutshwa uSukuzukuduma kanye lasegangeni ehlutshwa ngabanye abafana ngenxa yokuphiwa intondolo aze alwe lamaSakade awathathele umkhonto. Babemklolodela.
Wayezithulela uSukuzukuduma. Wayethi angaswela ukudla ngekhaya azame ngakuZatha ababeselusa bonke. Langathize wayakuye uZatha kanti uMaGumbo uzamfica khona.
Wathetha wabhuqukeza ngalesisenzo sikaZatha sokunika uSukuzukuduma ukudla. Zonke izisebenzi lapha ekhaya zavalwa ekusizeni uSukuzukuduma ekudleni. UMaGumbo wayethi uyaphindisela abakwenziwa ngaMaSakade ebahlupha. Wafa kabili eseyisigqili kanye lokufela ububi babantu bakibo uSukuzukuduma. Wayehlezi ephethe umkhonto lo awuthathela amaSakade kanye lenduku. Wayehlala ejimbile ngentonga yakhe le.
Izikhwehle, amanqina kwakusiwa kuwile kuSukuzukuduma. Abagangileyo babeke bamthathele inqina lakhe azithulele. Langekhaya kwakusebiwa ukudla kuthiwe nguye uSukuzukuduma.
Yadliwa inyama yolimi ekaSinyoro kwesulelwa icala kuye ngabantwana bakaMaGumbo ikakhulu uSiwoga loMajeyi. Egangeni ijaha lenqina laphinda umkhuba walo wokuthathela uSukuzukuduma.Lelilanga wala uSukuzukuduma, wayabikela ingqwele. Isitha sakhe esasinguSilango sathi uSukuzukuduma angeke amenze lutho.
Badibana ingqwele isithe ayizingeni ezababili. USilango watshaywa nguSukuzukuduma waze wayathotshwa ngunina ngekhaya. UMbozo ngomunye laye owatshaywayo waba loduma ekhanda. Kusukela lelolanga bamesaba uSukuzukuduma kanye lengqwele eyayizizwa asibali loZatha ababehlala bonke. Bamesaba uSukuzukuduma.
Ngemva kwesikhathi wayesekhulile uSukuzukuduma. Wayesengohlala ehluphekile emonyeni ngemvelaphi yakhe. Waze wabuza uPayiva ngoba wayebona njalo esizwa ukuba akazalwa labo Siwoga, bona futhi ababengelusiswa izinkomo lapha ekhaya.
Kwaphanga kwamcacela ukuba ngeqiniso wayengesuwalapha ekhaya. Wakuzwa ukuba yena watshontshwa eMaSakadeni. Weza. Wezwa njalo lokuba wayelethelwe ukuba abeyisigqili ekusebenzeni lapha ekhaya kungelambadalo.
Waphila kubi- ke uSukuzukuduma , wayeze akhale eyedwa. Wayeselusa kuhle izinkomo azilethe ekhaya zizonke esesaba ukuphathwa kubi nguMaGumbo. Indaba yokuba abanye abantwana babengelusi ayimphathanga kuhle layo.
UMaGumbo wayemzonda okumangalisayo aze atsho lokuba akasunina yena. Wahlala emanyosi uSukuzukuduma edinga sibi sebizo lakhe ayengalazi. Wala uPayiva ukumtshela lapho avela khona.
