Online Reporter
Sikhumbuzo Dabengwa
Ugwalo: Umendo
Olulotshwe nguBarbara C Makhalisa
INJONGO ZoMLOBI KUGWALO
Uma sikhangela izinjongo zogwalo sithola ukuba umlobi kunengi akade ekuhlosile ekulobeni ngezindikimba ezehlukeneyo zogwalo. Ezinye zalezo zehlakalo beziyikubonisa uluntu ukuba uthando lomuntu ongelathando kuwe lucina lubhidlikile. Sibona uGugu ethandana loNdaba owayengelalo uthando enhliziyweni yakhe, emhlanganisa lamakhikhitha engelandaba lokuba wayesizwa njani, kuphela yena ezijabulisa. Watshengisa ukungamnakeleli njengomkakhe.
Eyinye inhloso yomlobi ngeyokulimukisa abesintwana ukuba bananzelele imikhuba eyayibachithela imizi kuzikhathi zakudala. Umkhuba wokuba ikhosikazi liyenda lihlalele kude lomkalo ligcine umndeni, umlobi ubona kufanele lesulwe. Sibona uGugu lomngane bewusola lo umkhuba. UMaMlilo waxwayisa uGugu ukuba ayeqaza umkakhe edolobheni funa wayesethethe khonale. Lakanye kwakunjalo.
Eyinye yezinjongo zomlobi ngezokubonisa abesintwana ukuba imikhuba yakudala yokumelela ukubizwa ngumkakho edolobheni layo yayichitha imizi. Sibona uGugu esolwa ngumkakhe ukuba wayezeleni engabizwanga edolobheni. Lokhu kwakumhlukuluza uGugu ngoba uNdaba wayeselibele ngaye labantwana bengelakudla kanye lamasimu okuba azisele wayengalawo.
Eyinye yenhloso kamlobi yikulimukisa uZulu ukuba umendo uyinsinda baphendule empilweni. Sibona uGugu kugwalo ehlupheka ekoMaZulu, aye edolobheni afike akhanzingeke, aye kibo lakho afike alahlwe ngabazali. Wafunda ukuba azimele aqondane lohlupho eyedwa.
Eyinye yezinjongo yomlobi iyikulimukisa uZulu ukuba ukuyengwa ngamakhikhitha kubi. Sibona uNdaba eziphanyeka ku Jenny ecabanga ukuba uyamthanda kanti hatshi. Ekucineni uJenny uyabutha impahla yakhe athengise adlulele kwabanye. Lokhu kwaba yisifundo ku Ndaba eselandela uGugu khonale eGwelu yena wayesele ezibusa lamakhikhitha amqedela imali lesikhathi waze wachithekelwa ngumuzi wakhe.
Sithola eyinye inhloso yomlobi iyikubonisa abazali ukuba bayekele ukwendisa abantwana ngenxa yokufuna imali. Sibona uyise kaGugu efuna uGugu ayekele ukuqhubeka ngokufunda ayekwenda unina esafuna ukuba aqhubeke.
Lokhu kwenza uGugu ahlupheke esedinga usizo lokufunda esencediswa nguThulani umendo usuwehlule.
Eyinye yezinjongo zikamlobi yikulimukisa uZulu ukuba kusasa kuyizolo. Sibona uNdaba kusamlungele ephatha kubi uGugu. Impilo isimkhafulile uya kuGugu ehuba ngesisu phansi eselibele ukuba wayemtshaya, emtshayela amakhikhitha endlini engeyomtshado wakhe belo.
Umlobi uhlose ukubonisa uZulu ukuba ilitshe liyenelisa ukugaya ngomunye umhlathi uzithole ususebenza wena ubuyisigcabha sokwesulela emnyango. UGugu waqala impilo kubi wayiphetha esengofundisayo eselesithupha sokubalisa abantwana abancane. Konke ukuba phansi kwaphela esegqoka izimpahla ezinhle, esehlala endlini azibhadalela yona lomntanakhe emgcinile kungelahlupho.
Umlobi ufuna ukuletha injongo enhle yokuba kuhle ukukhetha abangane abaqotho ekuphileni. Sibona uGugu esizwa nguThulani abamazi ngomngane wakhe uMusa. Bacina bethathene loThulani ngoba ubungane babo benza basondelelana ngenxa yenhlupho ezifanayo.
Zinengi izinjongo zikamlobi bafundi. Qhubeka ngazo mfundi.
